Վիտալի Կլիչկոն առաջատարն է Կիեւի քաղաքագլխի ընտրություններում

 Կիեւի գործող քաղաքագլուխ Վիտալի Կլիչկոն հաղթում է ընտրությունների առաջին փուլում: Ինչպես տեղեկացնում է «Արմենպրես»-ը, հղում անելով «Ուկրաինայի ընտրողների կոմիտե» հասարակական կազմակերպության սոցիոլոգների տվյալներին, Կլիչկոն հավաքում է ընտրողների ձայների 40,4 տոկոսը:

Նրա մերձավոր մրցակիցը՝ «Բատկիվշինա» կուսակցությունից թեկնածու Վլադիմիր Բոնդարենկոն, ստանում է ձայների 8,7 տոկոսը, երրորդ տեղում, նախնական տվյալներով, Կիեւի նախկին քաղաքագլուխ Ալեքսանդր Օմելչենկոն է՝ 8,1 տոկոս ձայներով:

Եթե ընտրական հանձնաժողովը հաստատի այս թվերը, կնշանակվի քվեարկության երկրորդ փուլ, քանի որ Ուկրաինայի օրենսդրության համաձայն, եթե ավելի քան 90 հազար բնակիչ ունեցող քաղաքի պետի ընտրություններում թեկնածուն չի հավաքում ձայների 50 տոկոսը, անցկացվում է երկրորդ փուլ:

Երկրորդ փուլ է սպասվում նաեւ Լվովում, Դնեպրոպետրովսկում եւ Օդեսայում:

Հոկտեմբերի 25-ին Ուկրաինայում տեղի են ունեցել իշխանության տեղական մարմինների ընտրություններ, որոնց ընթացքում ընտրվել են մարզային եւ շրջանային նշանակության 358 քաղաքների քաղաքագլուխներ, ինչպես նաեւ մարզային ու շրջանային խորհուրդների պատգամավորներ: Ընտրություններ չեն անցկացվել Դոնեցկի եւ Լուգանսկի մարզերի այն մասերում, որոնք վերահսկում են ինքնահռչակ ԴԺՀ-ն եւ ԼԺՀ-ն, ինչպես նաեւ Դոնեցկի մարզի 91 եւ Լուգանսկի մարզի 31 բնակավայրերում, որոնք վերահսկվում են Կիեւի կողմից: Դրանցում, ինչպես նշում են Ուկրաինայի իշխանությունները, հնարավոր չէ ապÕ �հովել ընտրողների եւ ընտրական հանձնաժողովների անդամների անվտանգությունը: