Մթերման գինը նվազեցրել են, գումարն էլ հետո կվճարեն

Ինչպես տեղեկացնում է Past.am-ը oգոստոս ամսին մթերած բերքի գումարին դեռ գյուղացին սպասում է: Արմավիրի մարզի Ակնալիճ համայնքի բնակիչները լոլիկ են հանձնել «ՄԱՊ» ընկերությանը, գործարանը դեռ չի վճարել նրանց:

«Ըստ պայմանագրի՝ խոստացել են, որ տարեվերջին վճարումները կկատարեն»,– «Փաստ» օրաթերթի թղթակցի հետ զրույցում փաստեցին լոլիկի մշակությամբ զբաղվողները:

Ակնալճի բնակիչներն այլ վերամշակող ընկերության բերք չեն հանձնել:
«Մարդիկ վախեցան ու «Արտաշատի պահածոների գործարանին» լոլիկ չտվեցին: Շատ ուշ է վճարում»,– փոխանցեցին նրանք:

Գյուղացիներին, սակայն, ամենից շատ մթերման ցածր գներն են զայրացրել: Այս տարի լոլիկի մթերման գինը վերամշակող ընկերությունները 40 դրամից դարձրել են 35: Հողագործն այս գինը ձեռառնոցի է համարում:

«Էդքան չարչարվել ենք, պարարտանյութ ենք գնել ու ջրի գնով հանձնում ենք: Էդ գումարը մեր ներդրած ոչ մի ծախսը չի հանում: Մթերման գինը պետք է 40 դրամից ավել լինի, որ կարողանանք մշակման ծախսերը հանել: Լոլիկն էն բանջարեղենը չի, որ ցանես, ու առանց մշակելու ինքն աճի: Օրինակ, տիզի դեմ պայքարելու համար 1 լիտր դեղը 46 հազար դրամով ենք գնում, պատկերացնո՞ւմ եք դա ինչ թիվ է, ու ստացած լոլիկը հանձնենք 35 դրամո՞վ»,– բարկացավ մեր զրուցակիցը:

Այստեղ լոլիկի որակյալ բերք էլ չեն կարողացել ստանալ՝ ոռոգման ջրի խնդիր են ունեցել:
Որտեղ որ ջուրը գալիս է ստորին «Հրազդան» ջրանցքից, այսինքն` Սևանից, այդտեղ ունենք խնդիրներ: Մերը այդ ջրանցքի ամենավերջին գյուղն է, գիշերվա որոշ ժամերի ջուր լինում է, իսկ ցերեկները, երբ մյուս համայնքները օգտվում են ջրից, մեծ դժվարություններ են առաջանում»,– պատմեցին Ակնալճի բնակիչները:

Այստեղ կամաց–կամաց հրաժարվում են լոլիկագործությունից, քանի որ գյուղացին բերքը ստանում է և չի կարողանում իրացնել:

Մթերման գործընթացից հիասթափված գյուղացին այս տարի լոլիկի ցանքատարածությունները կտրուկ կրճատել է:

Համայնքի ղեկավար Գևորգ Միսակյանի հրապարակած տվյալներով` ցանքատարածությունները պակասել են 80 հեկտարով:
Ակնալճի բնակիչների խոսքով՝ եկող տարի կրկին լոլիկ քիչ են մշակելու:

Մանյա Պողոսյասն