Թյուր տվյալների հաշվին բնակչության թիվը գերագնահատվում է

Ի՞նչ ցուցանիշ կունենանք տարեվերջին

«Փաստ»–ի նախորդ համարներից մեկում տեղեկացրել էինք, որ Հայաստանի Ազգային վիճակագրական ծառայության տվյալներով՝ 2017 թ. առաջին եռամսյակում ՀՀ մշտական բնակչության թվաքանակը կազմել է 2981500 մարդ: 2017 թ. երկրորդ եռամսյակում այդ թիվը նվազել է՝ հասնելով 2979900–ի: Սա փաստում էր այն մասին, որ առաջին եռամսյակի նկատմամբ երկրորդ եռամսյակում մշտական բնակչության թիվը 1600–ով նվազել է: Իսկ 2016 թ. մշտական բնակչության ցուցանիշը գերազանցում էր 2017 թ. թե՛ առաջին և թե՛ երկրորդ եռամսյակային տվյալներին: Նախորդ տարի ՀՀ մշտական բնակության թվաքանակը կազմել է 2986100 մարդ: 2016 թ. տվյալների համեմատ՝ 2017 թ. երկրորդ եռամսյակում ՀՀ մշտական բնակչության թիվը նվազել է 6200–ով:
Ժողովրդագետ Ռուբեն Եգանյանի տվյալներով՝ իրավիճակն իրականում ավելի վատ է, քան ԱՎԾ–ի տվյալներն են:

«Այդ թվերը նախնական պայմանական մեծություններ են, դրանք իրականությունից շատ հեռու են: Իրականում մարդկանց թվաքանակի նվազումը շատ ավելի մեծ է, քան 1600–ը, կամ 6200–ը: Եթե նայենք ՍԵԿՏ համակարգի թվերը, ապա տարվա վերջում իրականում մոտ 30–40 հազար մարդկանց բացասական մնացորդ կունենանք»,–«Փաստ»–ի հետ զրույցում ասաց Ռուբեն Եգանյանը:

Անդրադառնալով ԱՎԾ տվյալներին, նա ընդգծեց, որ վերոնշյալ տվյալները բնակչության շարժի ցուցանիշն են:

«Ծնելիության, մահացության և միգրանտների գալու և գնալու հաշվին բնակչության թիվը շարունակաբար փոփոխվում է: Կարծում եմ՝ տվյալ դեպքում այդ նվազումը պայմանավորված է միգրացիոն գործընթացներով: Ավելի շատ միգրանտներ գնացել են, քան եկել: Բայց դրանք դեռևս ամբողջական տվյալները չեն: Վերջնական ու ավելի հավաստի տվյալները տարվա վերջում կլինեն:

Այդ ցուցանիշները պայմանական են նաև այն պատճառով, որ միգրացիայի հաշվառումը մեզ մոտ այնքան էլ հաջող չի կատարվում»,– ընդգծեց մեր զրուցակիցը:

Հարցին, թե ո՞րն է անհաջող հաշվառման պատճառը, Ռ. Եգանյանը պատասխանեց. «Մարդկանց հիմնական մասը պաշտոնապես որևէ ձևով չի արձանագրում իր միգրացիոն ուղևորությունները, այդ պատճառով մենք միշտ միգրացիայի վերաբերյալ թյուր տվյալներ ենք ունենում: Այդ թյուր տվյալների հաշվին էլ մենք շարունակ գերհաշվառում ու գերագնահատում ենք մեր բնակչության թիվը: Եթե վեց և ավելի ամսով Հայաստան եկող կամ երկրից գնացող մարդիկ պահպանեն առկա միգրացիոն հաշվառման հանձնարարականները, ամեն ինչ հստակ կլինի: Բայց քանի չեն պահպանում և մարդկանց շատ փոքր մասն է հետևում այդ հանձնարարականներին, մենք հստակ թվեր չենք իմանա: Հստակ չի լինի՝ ինչքան գնացին, ինչքան եկան:

Իսկ հարցին, խնդիրն իրականում մարդկա՞նց, թե պետական վերահսկողության մեջ է, Ռ. Եգանյանը պատասխանեց. «Իրականում ինչ–որ տեղ միգրանտների խնդիրն է: Բացի այդ՝ նաև, այո, պաշտոնական մարմինների խնդիրն էլ կա: Համենայն դեպս, պետական մարմինները հետևողականություն կամ որոշակի փորձեր չեն անում այդ իրավիճակը քիչ թե շատ շտկելու համար»: