Կրեմլի «տրոյական ձին»

Ռուս հաղորդավար, շոու-բիզնեսի, քաղաքական կյանքի ակտիվ ներկայացուցիր Կսենյա Սոբչակը երեկ հայտարարեց, որ պատրաստվում է մասնակցել մյուս տարի մարտին տեղի ունենալիք նախագահական ընտրություններին: Մինչ նրա հայտարարությունը, մամուլը Կրեմլի աղբյուրներին հղում տալով արդեն իսկ գրել էր Սոբչակի հնարավոր առաջադրման մասին: Իսկ առաջադրումից օրեր առաջ էլ Սոբչակը հանդիպել էր իր հոր վաղեմի ենթականերից մեկի ՝ Վլադիմիր Պուտինի հետ:

Սոբչակի մոտիվացիան ՝ առաջադրվել նախագահական ընտրություններում, արդեն իսկ արժանացել է բազում քննադատությունների: Ակնհայտ է, որ նա ընտրություններին մասնակցում է այժմ կալանքի տակ գտնվող Ալեքսեյ Նավալնիի էլեկտորատը զբաղեցնելու համար: Իսկ Նավալնիին, ամենայն հավանականությամբ չեն թույլատրի մասնակցել ընտրությունների:

Սոբչակի առաջադրումը մի շարք հարցեր է վեր հանում: Նա, բնականաբար ռեալ շանսեր չունի: Ռուսաստանի պահպանողական հատվածը նրան համարում է օտար: Նա օտար է նաև թե համակարգային լիբերալների, թե արտահամակարգային լիբերալների համար: Համակարգային լիբերալների համար նա չափից դուրս անկանխատեսելի ու անկիրթ է, ինչպես նաև բավարար նվիրված չէ համակարգին, չնայած նրան, որ հոր ազգանվան շնորհիվ շատ դռներ են բացվել նրա առջև: 

Արտահամակարգային լիբերալներն էլ նույն պնդմամբ նրան կասկածում են իշխանական ական լինելու մեջ և չեն վստահում: Անզեն աչքով վերլուծությունն էլ ցույց է տալիս, որ Սոբչակը ոչ միայն չէր կարող հաղթել ընտրություններում, այլև չի կարող նույնիսկ բավարար ձայներ հավաքել քիչ թե շատ քաղաքական կշիռ ձեռք բերելու համար: Այս ընտրություններում նրա դերակատարությունը երկու նպատակ ունի:

1-ին ՝ դառնալ թիրախ ընդդիմադիր էլեկտորատի համար, կամ ձայներ փախցնել կամ էլ դառնալ քննադատության թիրախ, որպեսզի Նավալնիի չառաջադրման դեպքում, էլեկտորատի այդ հատվածը զբաղվի ծեղկ օրակարգով

2-րդ ՝ իր բավական սկանդալային անցյալի ու ներկայի, էպատաժային կերպարի շնորհիվ Սոբչակը դառնում է կլոուն, որի նպատակը ընտրությունները անլրջացնելը, ապաքաղաքականացնելն է, ինչը հնարավորություն կտա Պուտինին ոչ միայն ընտրվել, այլ ընտրվել բավականին հանգիստ պայմաններում: Սա փորձված քաղաքական տեխնոլոգիա է: Պուտինն, անշուշտ, կարող էր հաղթել Նավալնիին, եթե վերջինիս առաջադրումը չխոչընդոտվեր, բայց այն 5, 10, 15 տոկոսը, որը կհավաքեր Նավալնին, հավակնում էր դառնալ կոնկրետ քաղաքական խավ, որը կառճակատվեր պուտինյան մեծամասնության հետ: Իսկ հավելյալ լարում Պուտինը չի ուզում:

Արտակ Ասլանյան