Ջրի խնդիր Արմավիրում. ահազանգ

Արմավիրի մարզի Արմավիր համայնքի մեծ մասն արդեն 2 օր է՝ զրկված է խմելու ջրից. «Փաստ» օրաթերթին ահազանգեցին համայնքի բնակիչները:

Համայնքը խմելու ջրով ապահովված չէ: Արտեզյան հորերի ջուրն այստեղ նաև որպես խմելու ջուր են օգտագործում:

Ոռոգման սեզոնին ընդառաջ՝ խմելու ջուր մատակարարող հորերն օգտագործվել են ոռոգման նպատակով: Ջրհորները համայնքապետարանից անցել են Ջրային տնտեսության պետական կոմիտեի հսկողության ներքո:

«Այս տարի երաշտ էր, պատճառաբանեցին, որ գետերն ու ջրանցքները ցամաքել են, բայց մեր գյուղում կան դեռ սովետական տարիներից հորատված, այն էլ` երաշտի դեպքում անմիջապես գործարկման տակ դնելու հորեր, սակայն, դրանք արդյունավետ չեն օգտագործում: Չեն մաքրում այդ հորերը, պետք է պոմպեր դնեն՝ չեն դնում, փող չեն ծախսում»,– հայտնեցին տեղացիները:

Գյուղացիների խոսքով՝ նախկինում արտեզյան հորերից օրական չորս ժամ անվճար ջուր էին ստանում:

«Արմավիրի գյուղի հետ որևէ կապ չունեցող այդ կառույցը, ժամը 1500 դրամով բնակիչների խմելու ջուրը կանխիկ դրամով վաճառում է որպես ոռոգման ջուր»,– ասացին նրանք:

Արմավիր համայնքը և մոտ 1000 հեկտար այգիներն ու տնամերձերը ոռոգման և խմելու ջուր են ստանում 3–4 խորքային հորերից: Համայնքի ղեկավար Ռաֆիկ Մարգարյանը պարզաբանեց, որ արտեզյան հորի պոմպը փչացել է, ինչի պատճառով էլ գյուղի մի մասը ջուր չունի:

Նա վստահեցրեց, որ խնդրի մասին տեղյակ են Ջրային կոմիտեում: Առաջիկա օրերին խնդիրը կկարգավորվի:

Մանյա Պողոսյան