Հայ գլադիատորներն ու եվրոպական պառնասը

Past.am-ը  տեղեկացնում է. Ավարտվեց ծանրամարտի մինչև 20 և 23 տարեկանների Եվրոպայի առաջնությունը: Հայ մարզիկների արդյունքները բացառիկ էին: Նախադեպը չէինք ունեցել, սակայն հուսանք` այս ամենը կկրի շարունակական բնույթ: Հայ մարզիկներն ընդհանուր հաշվով նվաճեցին 32 մեդալ, որոնցից 18–ը՝ ոսկե: Նրանք իրենց ջանասիրության և բացառիկ տաղանդի շնորհիվ հետ թողեցին բոլոր մրցակիցներին: Դժվար է ասել՝ եվրոպական որևէ երկիր, որը մինչ այս մասնակցել է նման մրցաշարերի, արդյոք նման արդյունք գրանցե՞լ է:

Այն, ինչ արեց փոքր Հայաստանի ծանրամարտի հավաքականը, բառերով չես կարող նկարագրել: Այս ուրախությունն իրավամբ հայ ժողովրդի ուրախությունն է: Ընդհանրապես, հայ հասարակությունն ուրախանալու շատ քիչ առիթներ ունի, և սա դրանցից մեկն է: Անցնող օրերին անընդհատ կարելի էր տեսնել, թե մարդիկ ինչ հուզմունքով էին էկրաններից հետևում մեր ծանրորդների ելույթներին: Ուրախանում և տխրում յուրաքանչյուրի հետ հավասար: Անշուշտ՝ տխրելու առիթներ շատ ավելի քիչ ունեցանք:

Ծանրամարտում այս հաղթանակները գալիս են ապացուցելու, որ սպորտում հաջողություններ գրանցելու համար երկրի փոքր լինելն էական չէ: Եթե ոլորտի նկատմամբ կա հետաքրքրություն և ներդրումներ, այն ամենօրյա հոգածության տակ է, ապա հաջողություններն անխուսափելի են: Գաղտնիք չէ, որ ինչպես սպորտի բազմաթիվ ոլորտներ, այդ թվում ծանրամարտը՝ գտնվում է ՀԱՕԿ նախագահ Գագիկ Ծառուկյանի հովանու ներքո:

Ծառուկյանն իր կատարած աշխատանքով ապացուցում է, որ ներդրումները, մարզիկների նկատմամբ վերաբերմունքը, համապատասխան պայմանների ստեղծումը և նմանատիպ դրական կողմերը, իրավամբ բերում են ցանկալի արդյունքի: Ինչպես ասում են՝ ժողովուրդը չի խաբում: Այն ամենը, ինչ պատմեցին մարզիկների ծնողները Ծառուկյանի հոգածության վերաբերյալ, իրոք տպավորիչ է:

Ծառուկյանն իր խոսքում շատ ճիշտ նշեց, որ մասնակիցներն այն մարզիկներն են, ովքեր ներկայացնելու են Հայաստանը 2020 թվականի օլիմպիական խաղերում: Համոզված ենք, որ նման հետևողական աշխատանքի պարագայում նույն ուրախության ճիչերը կունենանք նաև օլիմպիական խաղերի ժամանակ: