Ռուսաստանի դեսպանատան ցուցադրությունը բացում է Օրենբուրգյան նրբախավ թաշկինակի գաղտնիքը

Հայաստանի Հանրապետությունում Ռուսաստանի Դաշնության դեսպանատանը «Դիվանագիտական նոտաներ» ծրագրի շրջանակներում Օրենբուրգի շրջանային կերպարվեստի թանգարանը կազմակերպեց «Օրենբուրգյան նրբախավ թաշկինակ» միջազգային թանգարանային նախագծի շնորհանդեսը, որն անցկացվում է Օրենբուրգի շրջանային ֆիլհարմոնիայի հետ համատեղ` «Օրենբուրգի մշակույթի օրերը Երևանում» խորագրի ներքո:

Հանդիսավոր արարողությունը իր ներկայությամբ պատվեց ՀՀ առաջին տիկին Ռիտա Սարգսյանը:

«Հայաստանում Ռուսաստանի Դաշնության դեսպանատան և ՀՀ-ում ՌԴ կրթության ու գիտության կենտրոնի աջակցությամբ` մենք Երևանի բնակիչների և հյուրերի համար նախապատրաստել ենք շատ հետաքրքիր մշակութային ծրագիր: Օրերս Արամ Խաչատրյանի տուն-թանգարանում կայացել է «Օրենբուրգյան նրբախավ թաշկինակ» նախագծի շնորհանդեսը, իսկ ՀՀ-ում ՌԴ դեսպանատանը ցուցադրում ենք մեր քաղաքում նրբախավից պատրաստված արվեստի գլուխգործոցները»,-հայտնեց Օրենբուրգի շրջանային կերպարվեստի թանգարանի տնօրեն Յուրի Կոմլևը`տեղեկացնելով, որ հոկտեմբերի 27-ին Հովհաննես Թումանյանի տուն-թանգարանում բացվելու է Ա. Ս. Պուշկինի «Կապիտանի աղջիկը» ցուցադրությունը:

Նա նկատեց, որ Օրենբուրգյան նրբախավ թաշկինակը պատրաստվում է օրենբուրգյան այծերի հատուկ ցեղատեսակի բրդից: «Ամեն մի թաշկինակ յուրահատուկ է և նման չէ իր նախորդին, քանի որ շատ մանրակրկիտ և դժվարին հեղինակային աշխատանքի արդյունք է: Նրբախավային արտադրությունը ունի ավելի քան 200-ամյա պատմություն. ռուս աշխարհահռչակ գրող Ալեքսանդր Պուշկինը իր «Կապիտանի աղջիկը» ստեղծագործությունում նկարագրում է, թե ինչպես էին կազակները կարողանում դիմանալ սահմռկեցուցիչ ձմռան պայմաններին. գաղտնիքը նրանց վերարկուների մեջ կարված նրբախավի շեր տն էր»,-շեշտեց Յուրի Կոմլևը:

Բանախոսը հավելեց, որ իրենք տարվա ընթացքում ցուցադրություններ են անցկացնում ավելի քան չորս-հինգ երկրներում: «Օրենբուրգի շրջանային կերպարվեստի թանգարանի պատմության ընթացքում ցուցադրություններ են կազմակերպվել Եվրոպայի և Ասիայի բազմաթիվ երկրներում` Գերմանիայում, Դանիայում, Շվեյցարիայում, Լյուքսեմբուրգում, Չինաստանում. առաջիկայում մենք ցուցադրություն ենք կազմակերպելու նաև Նեպալում»,-նշեց Կոմլևը:

Հանդիսավոր միջոցառումն ավարտվեց համերգով, որի ընթացքում ՌԴ վաստակավոր արտիստ, Մորդովիայի Հանրապետության ժողովրդական արտիստ Յուլյա Ուչվատովան և Օրենբուրգ քաղաքի մշակույթի վաստակավոր գործիչ, ակորդեոնահար Անդրեյ Գլինկան կատարեցին Վ. Բոկովի և Գ. Պոնոմարենկոյի հեղինակած «Օրենբուրգյան նրբախավ թաշկինակ» երգը, ինչպես նաև այլ կատարումներ: