Աֆղանստանում եւ Պակիստանում երկրաշարժի զոհերի թիվը գերազանցել է 260-ը

Աֆղանստանում եւ Պակիստանում երկրաշարժի զոհ է դարձել առնվազն 263 մարդ, տեղեկացնում է «Արմենպրես»-ը՝ հղում անելով Associated Press-ին:

Պակիստանում զոհվել է առնվազն 228 մարդ, հազարից ավելի բնակիչներ վերքեր են ստացել: Աֆղանստանի իշխանություններն, իրենց հերթին, հայտնել են 33 զոհվածների եւ 200-ից ավելի վիրավորների մասին: Երկու զոհվածների մասին հայտնել են Հնդկաստանի Քաշմիրի տարածաշրջանի իշխանությունները:

Տուժած երկրների լեռնային շրջաններից շարունակում են հաղորդումներ ստացվել ավերածությունների մասին: Աֆղանստանի Բադախշանի նահանգում ավերվել են տասնյակ տներ: Ուժգին ցնցումներ են զգացվել Քաբուլում. բազմաթիվ շենքեր մնացել են առանց էլեկտրականության, երկրաշարժից անմիջապես հետո չի աշխատել հեռախոսակապը:

Իշխանությունները նախազգուշացնում են, որ զոհվածների թիվը կարող է զգալիորեն աճել, քանի որ առայժմ տվյալներ չկան հեռավոր շրջաններում տեղի ունեցածի վերաբերյալ:

Երկրաշարժը տեղի Է ունեցել հոկտեմբերի 26-ին Երեւանի ժամանակով ժամը 13:19-ին: ԱՄՆ-ի Երկրաբանական ծառայության տվյալներով՝ երկրաշարժի օջախը գտնվում Է 196 կիլոմետր խորության վրա՝ Հննդուկուշի լեռներում՝ Աֆղանստանի Բադախշան հյուսիսային նահանգի Ֆեյզաբադ քաղաքից 82 կիլոմետր հարավ-արեւելք ընկած շրջանում եւ Պակիստանի Հայբեր-Պահթունհվա նահանգի Չիթրալ քաղաքից 67 կիլոմետր հեռավորության վրա: Տարբեր ուժգնությամբ ստորգետնյա ցնցումներ են զգացվել Միջին Ասիայում եւ Հարավային Ասիայի մեծ մասում, մասնավորապես Հնդկաստանում, Տաջիկստանում եւ Նեպալում:

Պակիստանի օդերեւութաբանական ծառայության տեղեկատվության համաձայն՝ երկրաշարժի մագնիտուդը կազմել Է 8,1: Եվրոպական-միջերկրածովյան սեյսմոլոգիական կենտրոնը եւ ԱՄՆ-ի Երկրաբանական ծառայությունը երկրաշարժի մագնիտուդը գնահատում են 7,5, հաղորդել Է «Ինտերֆաքս»-ը:

Լուսանկարը`Tacc