Արմավիրի մարզի Թարգմանչաց վանքի վերականգնման աշխատանքները շարունակվում են

 Հայաստանի Արմավիրի մարզի Այգեշատ գյուղի Թարգմանչաց վանքի ամրակայման, նորոգման և վերականգնման աշխատանքները ավարտին կհասցվեն մինչև տարեվերջ: Վերականգնման գործընթացը մեկնարկել է 2017 թվականի օգոստոսի վերջին: ՀՀ մշակույթի նախարար Արմեն Ամիրյանը հոկտեմբերի 28-ին լրագրողների ուղեկցությամբ մեկնել  էր Արմավիր՝ տեղում հետևելու իրականացվող աշխատանքներին:

«Պահպանված էր հուշարձանի հյուսիսարևելյան հատվածը, խորանը և հյուսիսային ավանդատունը: Վերակառուցման գործընթացն իրականացնելիս մեզ  շատ են օգնել արխիվային լուսանկարները, որոնց միջոցով կարելի է հստակ պատկերացում կազմել շինության նախնական տեսքի մասին:  Կառույցից մնացել  էին 25  խոշոր զանգվածներ և 740 մանր կտրորներ, որոնք ամբողջական տեսքով՝ առանց քանդելու տեղադրվել են իրենց տեղերում: Ամենխոշոր զանգվածը շուրջ 30 տոննա քաշ ունի: Հայաստանում նման հսկայական բեկորներով վերականգնողական աշխատանքներ առաջին անգամ են իրականացվում»,-«Արմենպրես»-ի հաղորդմամբ՝ նշեց նախագծի հեղինակ, վերականգնող ճարտարապետ Սուրիկ Սարոյանը:

Նրա խոսքով՝ կառույցի չափագրական աշխատանքները սկսվել են 1982 թվականին, նախագծային աշխատանքները՝ 1985-ին: Շինարարական գործընթացներ տարվել են 1988 թվականին.  հետո դադարեցվել են: Վերակառուցման նոր նախագիծը մշակվել է 2011-ին:  2012-ից սկսվել են շինարարական աշխատանքները:

«Աշխատանքների մեկնարկի թույլտվությունը ՀՀ մշակույթի նախարարությունը  տվել է 2017-ի օգոստոսի վերջին: Նախագիծը պետք է ավարտին հասցնել մինչ տարեվերջ: Որոշ բաներ բաց են մնացել, քանի որ մեզ մեկ ամիս էր անհրաժեշտ միակոր, երկկոր քարերը գործարանում պատրաստելու համար: Դրանցով պետք է վերականգնվի վանքի տանիքը: Քարերը երկու օրից կլինեն շինհրապարակում»,-շեշտեց «Արհովշին» շինարարական կազմակերպության ներկայացուցիչ Կարեն Նազլուխանյանը:

Չնայած վերը նշված պատճառներին՝ ՀՀ մշակույթի նախարար Արմեն Ամիրյանին չբավարարեցին կատարված աշխատանքների ծավալները: Նա անբարեխղճություն համարեց ժամկետների ուշացումը և խոստացավ մեկ շաբաթ կամ տասը օր հետո կրկին վերադառնալ շինհրապարակ և ավելի շոշափելի արդյունքներ տեսնել:

Շինարարները պատրաստակամություն հայտնեցին մինչ նախարարի հաջորդ այցը ավարտել նախագծի 80 տոկոսը:

Թարգմանչաց վանքը 7-րդ դարի առաջին կեսի հռիփսիմեատիպ կառույց է Վաղարշապատի Հռիփսիմեի տաճարի ոճով: Թարգմանչաց վանք է անվանել Մեսրոպ եպիսկոպոս Սմբատյանը։