«Կիլիկիա» թանգարանում տեղի է ունեցել ցեղասպանությունների վերաբերյալ երիտասարդական մեկօրյա համագումար

 Միջին Արևելքի եկեղեցիների խորհրդի հովանավորությամբ և Մեծի Տանն Կիլիկիո կաթողիկոսության երիտասարդական բաժնի կազմակերպությամբ «Կիլիկիա» թանգարանի «Գյուլբենկյան» սրահում տեղի ունեցավ «Ցեղասպանությունների ճանաչում և կանխարգելում» թեմայով երիտասարդական մեկօրյա համագումար, որին մասնակցել են հայկական և օտար երիտասարդական ու եկեղեցական միությունների ներկայացուցիչները:

 Այս մասին «Արմենպրես»-ը տեղեկացավ Կիլիկիո կաթողիկոսության պաշտոնական կայքից: Համագումարի բացումը կատարել է Արամ Ա Վեհափառ Հայրապետը: Ողջունելուց հետո Մեծի Տանն Կիլիկո կաթողիկոսության երիտասարդական բաժնի նախաձեռնությամբ կազմակերպված համագումարում ընդհանուր ակնարկ է արվել Հայոց ցեղասպանության 100-րդ տարելիցի կարևորության մասին: Վեհափառ Հայրապետը հիշեցրել է, որ 100-րդ տարելիցի իմաստն ու նպատակը երեք բառերի մեջ  են խտացված՝ հիշել, հիշեցնել ու պահանջել:

«Հայոց ցեղասպանությունը կրոնական նկարագիր չունի, այն պատմական իրողություն է, և, հետևաբար, Թուրքիան չի կարող ուրանալ: Նոր ցեղասպանությունները կանխարգելը ենթադրում է անցյալի ցեղասպանությունների դատապարտում»,- նշել է Վեհափառ Հայրապետը:

Համագումարը շարունակվել է հաջորդական երեք նիստով, որոնց ընթացքում ներկայացված զեկույցներից են «Հայոց ցեղասանության 100-ամյա պայքարը», «Ցեղասպանության կանխամտածված բնությունը», «Հայկական հարցը և միջազգային օրենքը», «Երիտասարդության դերը ցեղասպանության ճանաչման ու հատուցման մեջ» և այլն: