Ազատ Արշակյան. «Հայաստանում, իսկապես, խրախուսվում է դասալքությունը, կեղծանմուշ հերոսությունը»

Past.am- ը տեղեկացնում է. ԱԺ–ում «Զինվորական ծառայության և զինծառայողի կարգավիճակի մասին» ՀՀ օրենքի նախագծի քննարկման ժամանակ «Ելք» խմբակցության պատգամավոր Էդմոն Մարուքյանը, խոսելով զինապարտների տարկետման իրավունքը վերացնելու մասին, նշեց, որ ներկայացվող օրինագիծն իր մեջ կեղծ «նոտաներ» կամ կատեգորիաներ է պարունակում: Որպես ապացույց նա նշեց այն հանգամանքը, որ տարկետման իրավունքի վերացմանը կողմ են արտահայտվում անգամ նրանք, ովքեր ժամանակին օգտվել են դրանից: Բացի այդ, իր համար անընդունելի էին շատ դրույթներ հենց այն պատճառով, որ նախագիծը ներկայացվում է մի իշխանության կողմից, որը մշտապես խրախուսել է բանակում չծառայելը՝ ծառայությունից խուսափածներին հետագայում մեդալներով պարգևատրելով:

ՀՀ Գերագույն խորհրդի պատգամավոր, հասարակական–քաղաքական գործիչ Ազատ Արշակյանը նույնպես համամիտ է պատգամավորի հետ, նշելով, որ Հայաստանում իսկապես խրախուսվում է դասալքությունը, կեղծանմուշ հերոսությունը: Նրա կարծիքով` այսօր հերոսների փոխարեն կեղծված մանեկեններ են պտտվում: Քաղաքական գործիչը համոզված է, որ զինապարտության մասին օրենքը պետք է համալիր փաթեթով ներկայացվի, իսկ հայոց բանակում ծառայելը պետք է գայթակղիչ և պատվի հարց լինի բոլորի համար:

«Իսրայելում աղջիկները ծառայում են երկու տարի, իսկ տղաները՝ երեք, բայց այնտեղ համալրման խնդիր չկա: Այնտեղ ծառայելու համար հերթեր են առաջանում, իսկ մեզ մոտ բանակից խուսափածին պարգևատրում են: Հարկավոր է սկսել նրանից, որ բանակում ծառայելը պատվաբեր լինի յուրաքանչյուրի համար, իսկ խուսափելը՝ ամոթալի»,– ասաց Ա. Արշակյանը:

Քաղաքական գործչի կարծիքով՝ զինծառայություն անցած քաղաքացիների իմիջը բարձրացնելու համար նախ պետք է սկսել բանակում ծառայածներին կարգավիճակ տալուց: Ներկայում զորացրվածները քաղաքացիական կյանքում առանձնապես որևէ կարգավիճակ էլ չեն ստանում, բայց պետք է ճիշտ հակառակը լինի, որպեսզի սայլը տեղից շարժվի:

«Բանակում ծառայած զինվորին բոլոր ոլորտներում արտոնություններ շնորհելը հայրենասիրության չափանիշ է, քանի որ հայրենիքի հանդեպ իր պարտքը հպարտությամբ կատարած անձը պետք է հայրենիքի փոխադարձ սերն իր հանդեպ մշտապես զգա: Ներկայում հասարակության, գործատուների, իշխանությունը կրողների կողմից զինվորական ծառայություն անցածների հանդեպ վերաբերմունքը կատաստրոֆիկ ցածր է: Բանակում ծառայածներն այսօր արտոնյալ կարգով աշխատանքի չեն ընդունվում, արտոնյալ պայմաններով բուհեր չեն ընդունվում և այլն: Այս հարցը պետք է շատ արագ կարգավորվի, որպեսզի բանակում ծառայելը դառնա ոչ թե պարտադրանք, այլ՝ ցանկություն »,– ասաց Ա. Արշակյանը:

Նրա կարծիքով՝ հայկական պետությունն արդեն կայացել է, բայց նրա կարևորագույն բաղադրիչի՝ բանակի հանդեպ հասարակության վերաբերմունքը կայացած չէ: Բայց այդ վերաբերմունքը վաստակելու համար ամենից առաջ նախ պետք է արդարությունը վերականգնել և թույլ չտալ, որ հավասարության նշան դրվի բանակում ծառայածների ու չծառայածների միջև:

«Արդարությունը կվերականգնվի, երբ բանակում չծառայած բոլոր պետական պաշտոնյաներն ազատվեն իրենց զբաղեցրած պաշտոններից, բացառությամբ հաշմանդամների: Այս երեք քայլերը կատարելու դեպքում արդեն չորրորդ քայլի անհրաժեշտությունն այլևս չի լինի և արդարությունը կվերականգնվի: Բանակում ծառայելը, հայրենիքը պաշտպանելը չպետք է հավասարվի ինչ–որ մարդկանց ունեցվածքը, գործը, կոռուպցիան կամ կալվածքները պաշտպանելուն, դա անարդարացի է»,– ասաց Ա. Արշակյանը:

Հիշելով ապրիլյան քառօրյայի ժամանակ 70–ամյա մարդկանց օրինակը՝ Ա.Արշակյանը հիշեց նաև այն մարդկանց, ովքեր լինելով գիտությունների դոկտորներ, անտեսելով սեփական առողջական խնդիրները, ծովի մակերևույթից 3000 մետր բարձրության վրա եկել էին կանգնելու զինվորի կողքին, զենք վերցնելու և հայրենիքը պաշտպանելու:

«Այ սա է հայրենասիրությունը: Եվ երբ հաստատվի արդարությունը, ամեն ինչ իր տեղը կընկնի: Այնպես որ, հայրենասիրությունը օրենքներով չի թելադրվում կամ պարտադրվում, այն սերմանվում է փաստերի վրա, և ժամանակն է սրա մասին մտածել, ոչ թե կեղծ օրակարգերով զբաղեցնել ժողովրդին»,– ասաց Ա. Արշակյանը:

Արմինե Գրիգորյան