Տհաճ միջադեպ հայկական ֆուտբոլում

Հայաստանի բարձրագույն խմբի Շիրակ-Ալաշկերտ հանդիպման ավարտին տհաճ միջադեպ է գրանցվել Ալաշերտի մարզիչ Աբրահամ Խաշմանյանի, Շիրակի երկրպագուների և Շիրակի մարզչական անձնակազմը ներկայացնող անձանից մեկի միջև: Տարբեր վարկածներով պարզ է դառնում, որ Խաշմանյանը ՝ պատասխանելով Շիրակի երկրպագուների հայհոյանքներին լեզվակռվի մեջ է մտել նրանց հետ, ինչից հետո Շիրակի մարզչական շտաբից մեկը հարվածել է նրան: Այդ ամենը երևում է նաև Շիրակի ու Ալաշկերտի ֆեյսբուքյան հրապարակումներից:

Երկրպագուների ագրեսիվ վարքը մի կողմից դատապարտելի է: Մյուս կողմից հենց ագրեսիվությունն է կոլորիտ տալիս երկրպագուներին: Փաստացի, այսօր կայուն երկրպագուների բազա ունի միայն Շիրակը ՝ քաղաքային թիմ լինելու պատճառով: Մյուս թիմերը նման աջակցություն չունեն: Բացի այդ ՝ ֆուտբոլի մարզադաշտը թատրոն չէ, կարելի է աղմկել, գոռալ, սուլել և այլն: Հայաստանը բնավ բացառություն չէ, ավելին, եթե համեմատենք եվրոպական առաջատար լիգաներում տեղի ունեցող անախորժ միջադեպերը երեկվա դեպքի հետ, ապա Հայաստանն այդ առումով շատ «կուլտուրական» երկիր է:

Ամեն դեպքում կա խնդիր հստակ տարանջատելու ակումբ-երկրպագուներ սահմանը: Պրոֆեսիոնալիզմը հենց այս սահմանով է անցնում: Եվ պրոֆեսիոնալիզմի գերնպատակը ոչ թե կիրթ ու չհայհոյող երկրպագուներն են, այլ ակումբների միջև հարաբերությունների կարգավորումը թե օրենքով, թե ֆեդերացիաների ընդունած կանոնակարգով, թե սպորտային ազնիվ խաղի նորմերով:

Սուրեն Սարուխանյան