17 պարային պրեմիերայով Գյումրիում նշեցին աշուղ Շերամի 160-ամյակը

Շերամյան համընդհանուր խանդավառությունը հոկտեմբերի 28-ին մեկ բեմում էր համախմբել հանրապետության 17 պարային համույթների՝ Երեւանից, Չարենցավանից, Ավոբյանից, Ստեփանավանից ու հանրապետության եւս 13 համայնքերից։ «Շիրակի էսքիզներ»-ի գալա-համերգի պահանջն էր այդպիսին․ մուտքը՝ միայն Շերամի երաժշտությամբ բեմադրված նոր պարային կատարումներով։ Փառատոնին երբեւէ մասնակցած ու մրցանակային տեղեր զբաղեցրած պարային համույթների գեղարվեստական ղեկավարների համար պահանջ-պայմանը որքան անսպասելի, նույնքան էլ հետաքրքիր էր։ Ու որքան էլ երկու ամսում նոր պար բեմադրելու տարակուսանքը մի պահ ստիպել էր վարանել, բայց ստեղծագործական հետաքրքրությունը գերազանցել էր երկմտանքին ու փորձասենյակներում շուրջ երկու ամիս ծնվում էին շերամյան բեմադրությունները։ Ո՞վ, ո՞ր երգի տակ, ինչպե՞ս ու ի՞նչ բեմադրեց․ երկամսյա ստեղծագործական խառնաշփոթը պարային խճանկար դարձավ հոկտեմբերի 28-ին՝ Շերամի բոլոր գույներով։

ՀԽՍՀ վաստակավոր արտիստ Սոֆի Դեւոյանը փառատոնի նախօրեին այսպես գնահատեց փառատոնի կազմակերպիչների՝ գալա-համերգը Շերամի հետ կապելու գաղափարը․ -Շատ հետաքրքիր գաղափար է, շատ․․․

Դուք կարող էիք ուղղակի գալա-համարգ անել, բայց դուք դա կապել եք Շերամի հետ։ Իսկապես հրաշալի է։ Այն, որ 17 պարային համույթ մասնակցում է այս ամենին, դա արդեն հաղթանակ է, դա արդեն մեր երկրի պատիվն է։ Դուք այնքան լավ եք սկսել, որ ես վստահ եմ՝ շատ ճիշտ ուղու վրա եք։Ձեզ կանաչ ճանապարհ, մենք միշտ ձեր կողքին ենք։ Սոֆի Դեւոյանի մշակույթի կենտրոնի «Արմելադ» պարային համույթը «Շիրակի էսքիզներ» հեռուստափառատոնի 4-րդ եթերաշրջանի հաղթողներից մեկն էր․ ի թիվս մյուս մրցանակակիրների արմելադցիները եւս Գյումրիում էին շերամյան նոր բեմադրությամբ։ Ընդհանուր թվով շուրջ 200 հայուհիներ Շերամ պարեցին՝ աշուղին բացահայտելով նոր տեսանկյունից՝ սեփական մոտեցումներով։ Համերգը ողջունեց «Բերդ» պարային անսամբլը, որի գեղարվեստական ղեկավար, ՀՀ մշակույթի վաստակավոր գործիչ,Հայաստանի ազգային պարարվեստի եւ պարագետների միության նախագահ Կարեն Գեւորգյանը «Շիրակի էսքիզներ» հեռուստափառատոնի 4-րդ եթերաշրջանի մրցույթի ժյուրի նախագահն էր։

-Հազարամյակներ շարունակ մեր ժողովուրդը ծնել է այնպիսի զավակներ, ովքեր աշխարհին ու մարդկանց ի ցույց են դրել մեր հոգու ցասումը, սերը, խնդումը։ Նմանօրինակ արժանավոր զավակներից է Շերամը, ում մետաքսյա հնչյունները այսօր թեւածում էին այս դահլիճում։ Ես շնորհակալ եմ բոլոր այն կազմակերպիչներին, ովքեր այս օրը տոն դարձրեցին մեզ համար։ Սիրտս հպարտությամբ է լցվում, երբ տեսնում եմ՝ այս բեմից բոլոր պարողները ներկայանում են պատշաճ մակարդակով, գեղեցիկ բեմադրություններով։ 160 տարի առաջ ով կմտածեր, որ Շերամի ստեղծագործությունները բոլոր ժամանակների համար են։ Հպարտության պահերից բացի ես ուզում եմ երախտագիտության խոսք ասել բոլոր նրանց, ովքեր նպաստեցին այս գաղափարի իրականացմանը եւ հույս հայտնել, որ բոլոր մասնակիցները կունենան ստեղծագործական բազում հաջողություններ՝ ի փառս հայ ժողովրդի եւ Հայաստան աշխարհի,-բեմից եզրափակեց Կարեն Գեւոգյանը։ Հարկ է նշել, որ Գյումրիում ծնունդ առած փառատոնը հստակ նպատակ ունի՝ յուրաքանչյուր եթերաշրջան ավարտել շոշափելի վերջնարդյունքով, մասնավորապես՝ նոր բեմադրություններ պարտադրել բոլոր մասնակից համույթներին․

Խաչատուր Ավետիսյան, Սայաթ-Նովայի ու Շերամ․ ո՞ւմ ստեղծագործությունների երաժշտությամբ բեմադրված պարերով կհարստանա մասնակից համույթների պարացանկը հաջորդ եթերաշրջանում՝ կազմակերպիչները դեռ չեն բացահայտում, բայց որ շարունակելու են աշխատել ի նպաստ պարարվեստի՝ հստակ ու անդավաճան նպատակ է, հանուն որի էսքիզյան հաջորդ համախմբումը կիրականանա գարնանը՝ հեռուստափառատոնի 5-րդ եթերաշրջանում։

Լիլիթ Թովմասյան