Պատանդառություն Արմավիրում. բռնությունը դառնում է մոդայիկ

Երեկ Արմավիր քաղաքի մանկապարտեզներից մեկում տղամարդը դանակով մտել ու պատանդ էր վերցրել մի երեխայի: Բարեբախտաբար երեխան ազատվեց պատանդառությունից, իսկ հանցագործը վնասազերծվեց: 

Տեղի ունեցածն անմիջապես դարձավ մեկնաբանման առիթ: Այն դրվեց մեկ շարքի մեջ ամերիկահայ գանգստերի ու դիպուկահարի դեպքի, Սասնա ծռերի, ընտանեկան բռնության օրինագծի և այլ թեմաների շարքում: Ամեն մեկն այն սկսեց մեկնաբանել այնպես, ինչպես իրեն ձեռք է տալիս:

Կոնկրետ դեպքի մանրամասներից ելնելով կարող է ի հայտ գալ տեղի ունեցածի հազար ու մի դրդապատճառ: Բայց հիմնական պատճառը, թե ինչու են Հայաստանում շատանում բռնության դեպքերը ու դրանք առավել քննարկելի դառնում ՝ երեքն են:

1-ին. Սասնա ծռերի, Նորքի զինված խմբի և Սամվել Բաբայանի Իգլայի գործերը ցույց տվեցին, որ երկրում առկա ներքաղաքական վակուումը լցնելու հարցում, որոշ մարդիկ ունեն իրենց պատկերացումները ՝ այն է հարցերը զենքով լուծել: Զենքով հարց լուծելու մոտեցումը, ի շնորհիվ նաև Սասնա ծռերի հանդեպ հանրային համակրանքի դարձավ քննարկելի ու ընդունելի տարբերակ հասարակության մի ստվար հատվածի կողմից:

2-րդ. փոխվում է հայաստանյան հասարակության կառուցվածքը, այլևս ավանդական-համայնական բարքերն ի զորու չեն համակեցության նախկին բնույթը պահպանել: Միաժամանակ դեռ չեն առաջացել փոխհարաբերվելու իրավական-քաղաքացիական մոտեցումները:

3-րդ՝ կապված ակտիվ քննարկման հետ. ոստիկանությունը վիճակագրություն է ներկայացնում, որ հանցագործությունները նվազում են, հասարակությունը չի հավատում: Մեծ է հանցագործությունների քննարկման մեդիաէֆեկտը, որին նպաստում են թե լրատվական դաշտում բազմաթիվ խաղացողների առկայությունը, թե սոցցանցային ակտիվությունը:

Սարգիս Մեսրոպյան