Նեթանյահուն և Թրամփի սրբազան սերը

Օրերս իսրայելական 9TV–ն հետաքրքիր մի հեռուստադեբատ եթեր հեռարձակեց, որից պարզ դարձավ, որ մեծ գովազդային վահանակների տեսքով Իսրայելի մայրուղիները ողողած Թրամփ–Նեթանյահու ջերմագին համբույրը, ասել է, թե՝ ԱՄՆ–Իսրայել առանձնահատուկ բարեկամությունը, վերջին շրջանում ոչ միայն նվազեցրել է Իսրայելի միջազգային վարկը, այլև հրեական պետության նկատմամբ ագրեսիայի և պառակտման առիթ է դարձել նույնիսկ ամերիկաբնակ հրեաների շրջանում: Բնականաբար, ամենատարբեր հարցերի տիրույթում երկրորդական չի համարվում Իսրայելի մերձավորարևելյան քաղաքականությունը, ինչը, հատկապես աշխարհիկ հրեաների տեսանկյունից, ԱՄՆ–ում սկսել են դիտարկել որպես Սպիտակ տան վզին փաթաթած դիրքորոշում, իսկ որ առավել կարևոր է՝ երկրում անտիսեմիտիզմի բորբոքման և հրեաների հանդեպ ատելության լրջագույն առիթ:

Ամերիկյան հրեաներն, այսպիսով, սկսել են կասկածի ենթարկել Իսրայելի կողմից Իրանին «սևացնելու» մշտական մարտավարության արդյունավետությունը և այդ երկրին ամեն կերպ տարածաշրջանային ապակայունացնողի դերակատարում վերագրելու փորձը: Այստեղ սկսել են ավելի ու ավելի բարձրաձայն խոսել այն մասին, որ Իրանն, ի տարբերություն իր հարևանների, ոչ թե անվտանգության սպառող, այլ դրա մատակարարողի/երաշխավորի դերում է հանդես գալիս՝ ինչպես վերջերս Իրանի ԱԳ նախարար Մոհամմադ Ջավադ Զարիֆը պնդեց, և ինչը Սիրիայի ու Իրաքի փորձառությամբ է հաստատվում:

Պարզվում է՝ այս դիրքորոշումն ամերիկյան հրեաները շատ երկար ժամանակ են փորձել Նեթանյահուի կառավարությանը հասցնել, որն ամեն կերպ արհամարհել է հիշյալ ուղերձները, ԱՄՆ հրեաների տեսանկյունից՝ շարունակելով ո՛չ Իսրայելի շահերին ծառայեցնել նախագահ Թրամփի, այսպես կոչված, ավետարանական/սրբազան, կամ՝ հանրապետական սերը Քրիստոս ծնած Ավետյաց երկրի նկատմամբ: Ինչ վերաբերում է հակաահաբեկչական պայքարին՝ մեր ուշադրությանն են արժանացվում 2014–ի իրաքյան դեպքերը, երբ ԱՄՆ–ն միայն օգոստոսին քայլեր ձեռնարկեց ԴԱԻՇ–ի նկատմամբ, իսկ Իրանն ու շիական աշխարհազորը հաշված օրերի ընթացքում օժանդակեցին Բաղդադին՝ խալիֆաթի էլ ավելի չտարածման համար:

Հետաքրքիր է, որ այս ամենին զուգակցվում են նաև Պենտագոնում առկա դժգոհությունները, ինչի մասին, ի դեպ, մենք դեռ անցած տարվա դեկտեմբերին գրեցինք, երբ ամերիկյան VOX–ը, Politico–ն և այլք տեսակետ էին հայտնում, որ «Կատաղած շուն» մականունով հայտնի գեներալ Մետիսը կարող է ոչ միայն պառակտում մտցնել Պենտագոնի բազեների ու աղավնիների շրջանում, այլև «փչացնել Թրամփին, որն առանց նրա էլ տարված է Իսրայելի նկատմամբ սրբազան սիրով»: Այսպիսով, ամերիկյան հրեաները տագնապում են այն մտքից, որ Նեթանյահուի կառավարությունը ԱՄՆ–ին հակում է Իրանի հետ պատերազմի, ինչը շատ ավելի ողբերգական հետևանքներ կունենա տարածաշրջանի և ողջ աշխարհի համար, քան՝ նույնիսկ Իրաքում, Սիրիայում և Աֆղանստանում ծավալված հակամարտությունը: Մի բան, ինչի մասին օրերս նաև ռեֆորմիստական ռավին Ռիկ Ջեյքոբսը խոսեց՝ հայտարարելով, թե վիճելի տարածքներում հրեական անօրինական կառուցապատման ջերմ պաշտպան Դավիդ Ֆրիդմանին ԱՄՆ դեսպան նշանակելուց հետո ինչ ասես՝ կարող ես սպասել Նեթանյահու–Թրամփ զույգից:

Ամենանշանակալին, սակայն, այն է, որ ԱՄՆ հրեաները, իրենց իսկ հավաստմամբ, այս քաղաքականության պատճառով գնալով ավելի ու ավելի ձախ հայացքներ են որդեգրում, իսկ հատկապես երիտասարդությունը սկսել է ուղղակի ատելություն տածել Նեթանյահուի կառավարության նկատմամբ՝ հաճախակի մասնակցելով ԱՄՆ–ում բնակվող պաղեստինյան երիտասարդության կազմակերպած ակցիաներին: Նույն իրավիճակն է նաև ինտելեկտուալ շրջանում, որի կարկառուն ներկայացուցիչները՝ հրեական ծագմամբ ամերիկաբնակ հայտնի գրող Մայքլ Չաբոնը, Մայքլ Բարնեթը, Դոու Վակսմանը և այլք, ճիշտ ԱՄՆ հրեական կազմակերպությունների նախագահների կոնֆերենցիայի անդամ Սեյմոր Ռեյխի նմանությամբ, համոզված են, որ եկել է ժամանակը Իսրայելի մասին անկեղծ զրուցելու…