«Վստահ եմ, որ բնակիչների հետ համատեղ, թիմային աշխատանքի շնորհիվ առաջիկա տարիներին կկարողանանք հետզհետե լուծումներ տալ բոլոր խնդիրներին». Հարություն Մանուչարյան

Նոյեմբեր 5-ին սահմանամերձ Տավուշի մարզում կկայանան խոշորացված Բերդ համայնքի ղեկավարի և ավագանու ընտրություններ: Այդ տարածաշրջանի 17 համայնքները կկազմեն Բերդ խոշոր համայնքը:Past.am-ը հետ հարցացազրույց է ունեցել Բերդ համայնքի ղեկավարի և ավագանու ընտրություններին մասնակցող, քաղաքապետի թեկնածու, գործող քաղաքապետ Հարություն Մանուչարյանի հետ:

«Ծնվել և մեծացել եմ Բերդ համայնքում և այն կապվածությունը, որ ունեմ մեր հող ու ջրի և բնակչության հետ՝ նկարագրելն ուղղակի անհնար է: Առհասարակ, ցանկացած մարդու համար, ծննդավայրը հարազատ տան նման է. հոգատար ես, նվիրված, բայց երբ սահմանամերձ շրջաններում ես ապրում, էլ ավելի են մեծանում զգոնությունն ու պատասխանատվությունը՝ ծննդավայրիդ ու բնակիչներիդ հանդեպ: Քառօրյա պատերազմի ժամանակ ոչ միայն մեր համայնքը, այլև բոլոր 17 համայնքներն իրենց աշխատանքով են կանգնած եղել սահմանին: Այսօր Բերդի տարածաշրջանում չկա մի միջոցառում, որ մեր զինվորները մեր կողքին կանգնած չլինեն, զինվորականների կողմից չկա նախաձեռնված մի ծրագիր, որ ժողովուրդը նրանց աջակցած չլինի: Եվ ընդհանրապես, համար առաջին անվտանգությունը ես մեր ժողովրդի կապն եմ համարում բանակի և բանակի կապը մեր ժողովրդի հետ»:

-Ընտրություններին մասնակցելու համար պետք է ունենալ հստակ ու հավակնոտ ծրագիր, որն էլ հենց դառնալու է համայնքի զարգացման առաջիկա տարիների ուղենիշը: Պարոն Մանուչարյան, ի՞նչ ծրագրով եք այսօր հանդես գալիս Դուք:

-Գիտեք, առաջիկա ընտրություններով կմիավորվեն մեր տարածաշրջանի բոլոր 17 համայնքները և Բերդը կդառնա մեկ խոշոր համայնք: Որպես նախընտրական ծրագիր ու առաջիկա անելիքների հստակ ուղենիշ, մենք պետք է հետևողական աշխատանքներ տանենք բոլոր համայնքների համաչափ զարգացման ուղղությամբ: Որևէ գյուղում ես չեմ լինելու ղեկավար, այլ լինելու եմ տվյալ համայնքի ղեկավարի աջակիցը և վստահ եմ, որ բնակիչների հետ համատեղ, թիմային աշխատանքի շնորհիվ առաջիկա տարիներին կկարողանանք հետզհետե լուծումներ տալ բոլոր այն խնդիրներին, որոնք դեռևս ծառացած են համայնքի առջև: Բոլոր այն ծրագրերն ու նախաձեռնությունները, որոնք կյանքի են կոչվել Բերդ համայնքում, պետք է հետևողականորեն իրականացվեն նաև մյուս բոլոր համայքներում, որպեսզի կարողանանք նույն մակարդակին հասցնել տնտեսության բոլոր ճյուղերը։

-Պարոն Մանուչարյան, բնակիչները հաճախ են Ձեր մասին խոսելիս օգտագործում «Մեր Հարութը» արտահայտությունը, ինչպես դա կմեկնաբանեք։

-Նման գնահատականի արժանանալը պարտավորեցնող է։ Մի բան հաստատ է. ես երբեք չեմ փորձել մեր ժողովրդից կտրվել, ինչի շնորհիվ էլ նաև այս օրերին պարզ ճակատով մտել եմ տարբեր համայքներ: Կարծում եմ ցանկացած պաշտոնյայի համար ամենակարևոր ձեռքբերումը բնակիչների գնահատականն է, որովհետև կատարած աշխատանքի արդարացի գնահատակը հենց նրանք են տալիս: Երբ դու հոգատար ես կողքիդ հարևանի, թաղամասի ու ամբողջ համայնքի հանդեպ, ամենևին էլ պարտադիր չէ` լինես պաշտոնյա: Եվ դեռևս այն տարիներին, երբ ես չեմ եղել համայնքի ղեկավար ու բազմաթիվ նախաձեռնություններ եմ ունեցել համայնքում, ամենևին էլ չեմ մտածել, որ այն կարող է ինձ մի օր պետք գալ, պարզապես գլուխս հանգիստ եմ դրել բարձին: