Համարձակ, գիտակցաբար ու «եթե»–ներով.Ըստ Կարեն Կարապետյանի՝ սոցիալական վիճակը չի վատացել

Տնտեսական, սոցիալական խնդիրներից մինչև 2018 թ.վարչապետի պաշտոն: Վարչապետ Կարեն Կարապետյանի հանդիպումը ԶԼՄ–ների ներկայացուցիչների հետ հարցերի հենց այս շրջանակն էր կանխատեսում:

Հանդիպման հարց ու պատասխանի ժամանակ լրագրողները վարչապետից նախ տնտեսական վիճակի գնահատականը ստացան:

«Այսօր մեր վիճակը կառավարելի և հեռանկարային եմ համարում: Ես չեմ ասում, որ բոլոր խնդիրները լուծել ենք: Օտարերկրյա ներդրողին բերելու համար մենք նախ և առաջ պետք է ակտիվացնենք մեր ներքին ներդրողին: Իմ գնահատմամբ՝ այս տարի մենք որոշակի ձևով ֆոնը փոխել ենք: Այն, որ ժողովրդի վիճակը չի լավացել, քանի որ կենսաթոշակ և աշխատավարձ չենք բարձրացրել, այդպես չէ: Բազմաթիվ երկրներ կան, որոնք տարիների ընթացքում մինիմալ աշխատավարձն ու կենսաթոշակը չեն բարձրացնում, բայց չի նշանակում, որ միջին եկամուտները չեն աճում»:

Գնաճի մասին ևս հարց հնչեց: Վարչապետն ընդգծեց՝ այս տարվա կտրվածքով իրենց կանխատեսումը 0,6–0,8% է. «Այդ պատճառով համաձայն չեմ ձեզ հետ, որ այս տարվա ընթացքում մեր քաղաքացու միջին սոցիալական վիճակը վատացել է»:

Հարցին, թե 5500 աշխատատեղերի կրճատումը սոցիալական լարվածություն չի առաջացնի՞, Կ. Կարապետյանը պատասխանեց. «Ասում եք՝ հարկ ենք տալիս, բայց դուք լավ չեք կառավարում: Հենց սկսում ենք օպտիմալացնել, ասում եք՝ սոցիալական լարվածություն: Ասում են՝ ուսուցչին ինչո՞ւ եք կրճատում: Դուք քիչ օրինակ գիտե՞ք, որ ուսուցիչն ուսուցիչ չէ, ու ավելի լավ է՝ ուսուցիչ չլինի: Մի քիչ ռացիոնալ պետք է նայել՝ պետական ապարատն ավելի մեծ է, քան պետք է լինի»:

Հերթը քաղաքականինն էր: Լրագրողներից մեկը նշեց՝ կան լուրեր, որ Սերժ Սարգսյանի հետ համաձայնության է եկել, ըստ որի՝ Կ. Կարապետյանը հաջորդ տարի փոխվարչապետ է լինելու: Լրագրողը հետաքրքրվեց նաև՝ արդյո՞ք համակարծիք է ՀՀԿ–ականների այն պնդումներին, որ Ս.Սարգսյանն անփոխարինելի է:

«Նման քննարկումներ մենք չենք ունեցել: Այդ իսկ պատճառով որևիցե պայմանավորվածության մասին խոսելն ուղղակի ապարդյուն է: Ինչ վերաբերում է Ս. Սարգսյանի վարկանիշներին և հայտանիշներին՝ որպես անվտանգության երաշխավոր, որպես մեծ փորձ ունեցող ղեկավար, ես այդ պնդումների հետ լիարժեք համաձայն եմ»,–ասաց վարչապետը:

Մեկ այլ լրագրողի հարցին, թե Կարապետյանը ո՞ր կուսակցությունից ժառանգեց ծանր վիճակում գտնվող տնտեսությունը, վարչապետը նշեց, թե ճգնաժամային վիճակը և արտաքին շուկաների ազդեցությունը մեր տնտեսության վրա լավ կյանքից չի եղել:

Լրագրողն ընդհատեց վարչապետին ու ասաց, որ իր հարցն այդ մասին չէ:

«Ես հենց դա եմ բացատրում: Դուք չգիտե՞ք, որ կուսակցությունից ենք ժառանգել: Հռետորիկ հարց ինչո՞ւ եք տալիս»։

Լրագրողը շարունակեց՝ նշելով, որ վարչապետն անդամակցել է մի կուսակցության, որը թեև ընտրություններում հաղթել է, բայց այն երբևէ լեգիտիմ չի ճանաչվել:

«Դա ձեր անձնական կարծիքն է: Շատ համարձակ և գիտակցաբար եմ անդամակցել ՀՀԿ–ին: Ես ժամանակին բացատրել եմ՝ ինչու եմ դա անում: Այն մարտահրավերների և պրոբլեմների պայմաններում, որոնց առջև կանգնած է երկիրը, չափազանց կարևոր է, որ մենք ցնցումներ չունենանք: Ինչ վերաբերում է նրան, թե ՀՀԿ–ն է հասցրել այդ կետին... Իսկ ո՞վ է գնահատել, որ եթե տնտեսական անկման այդ պայմաններում այլ կուսակցություն լիներ, իրենք ինչ կետի կհասցնեին»,– ասաց վարչապետը:

Լրագրողը նկատեց՝ սովորաբար պաշտոնյաները չեն սիրում «եթե»–ներով հարցերի պատասխանել, բայց հիմա Կ. Կարապետյանը «եթե»–ով է պատասխանում:

«Իսկ դուք ի՞նչ գիտեք, «եթե»–ներով սիրում եմ, թե՝ չէ: Ես գտնում եմ, որ ՀՀԿ–ն նախկինում անցած ժամանակահատվածը քիչ կորուստներով է անցել, քան հնարավոր էր»,– արձագանքեց վարչապետը:

Լրագրողներից մեկի հարցին, թե ի՞նչ նպատակ ունի, ցանկանում է 2018թ. ապրիլից հետո մնալ վարչապետի պաշտոնին, թե կարծում, որ օրինակ՝ Վիգեն Սարգսյանն ավելի հաջող թեկնածու է, կամ այլ թեկնածուներ կան, Կ. Կարապետյանը պատասխանեց. «Ես հստակ ասել եմ՝ պատրաստ եմ: Ի՞նչ եմ ուզում անել: Կարող է մի քիչ ամպագոռգոռ հնչի, բայց ծառայել մեր երկրին: Ես վստահ եմ, որ մենք տրամաբանական ու զարգացող երկիր կարող ենք ունենալ: Ինչպիսի որոշում կկայացնի ՀՀԿ–ն՝ շատ պարզ ձևակերպված է: Մենք նոր Սահմանադրություն ենք ընդունել, նոր կարգավիճակի ենք անցնում, ուր հստակ ձևակերպված է, թե ինչպես դա կլինի: Այդ իսկ պատճառով, հարգելի՛ լրագրողներ, եթե այդ մասին լրացուցիչ հարց եք տալու՝ չեմ պատասխանելու»: