Կատալոնիան չի նահանջում

Բարսելոնայում անհանգիստ իրավիճակ է. նախորդ գիշեր, հատկապես տուրիստական շրջաններում, անկախության կողմնակիցները կրկին կաթսաներով դուրս են եկել փողոց և շերեփներով դրանց հարվածելով՝ աներևակայելի աղմուկ են բարձրացրել: Բողոքի երթին զուգահեռ՝ կատալոնացիներն իրենց դրոշներն են կախել պատշգամբներից, և նրանք, ովքեր իրենց բնակարաններում են մնացել, տեղերում են միացել Կաթսաների ակցիային: ABC հեռուստաընկերության փոխանցմամբ՝ կատալոնացիները բողոքում են Իսպանիայի դատարանի կայացրած որոշումից, որի համաձայն՝ իրավապահները ձերբակալել են Պուչդեմոնի կառավարության բոլոր 8 անդամներին: Հաշվեհարդարից խուսափել է միայն վարչապետի խորհրդական Սանտի Վիլան, որը հրաժարական էր տվել դեռ Անկախության հանրաքվեի նախօրեին, բայց նա էլ ստորագրություն է տվել երկրից չհեռանալու վերաբերյալ և միայն 50000 եվրո տուգանք վճարելուց հետո կարող է ազատվել իսպանական արդարադատությունից:

Ի դեպ, Իսպանիայի ազգային դատական կոլեգիան շարունակում է դիտարկել նաև Կատալոնիայի էքսվարչապետ Կարլես Պուչդեմոնի ձերբակալման հնարավորությունը և նոյեմբերի 1–ին արդեն իսկ դատարան ներկայանալու ծանուցում էր ուղարկել վերջինիս, որը հրաժարվել է Իսպանիա վերադառնալ և Մադրիդի վերջին քայլերը ժողովրդավարության և սպասվող խորհրդարանական ընտրությունների դեմ իրականացված ծանր հարված է որակել: Հաստատելով, որ ամենևին չի հավատում իսպանական արդարադատությանը՝ Պուչդեմոնը հրապարակայնորեն վրդովվել է հատկապես խռովության և պետական միջոցների հափշտակության՝ Կատալոնիայի կառավարության դեմ ներկայացված մեղադրանքների առիթով, որոնց դեպքում երկրամասի կառավարիչներին մինչև 30 տարի ազատազրկում է սպառնում:«Կատալոնիայի լեգիտիմ կառավարությանը բանտ են նետել իր գաղափարների և այն բանի համար, որ նա հավատարիմ է գտնվել Կատալոնիայի խորհրդարանում իրեն տրված մանդատին: Որպես Կատալոնիայի լեգիտիմ վարչապետ՝ ես պահանջում եմ անհապաղ ազատ արձակել այդ մարդկանց»,– հայտարարել է Պուչդեմոնը՝ հավաստիացնելով, որ ամենևին էլ չի պատրաստվում թաքնվել եվրոպական արդարադատությունից և մտադիր է աշխատել բելգիական դատարանի հետ: 

Խնդրի առնչությամբ փորձագետները նշում են, որ Մադրիդը դժվար թե Բրյուսելին դիմի՝ Պուչդեմոնին արտաքսելու, կամ՝ արտահանձնելու խնդրանքով, և եթե նույնիսկ այդպիսի բան պատահի, այս անգամ արդեն Եվրամիությունը քայլեր կձեռնարկի դրա խափանման համար, որովհետև այդպիսով Մադրիդը կատալոնացիներին նոր ծայրահեղական բասկերի կվերածի՝ ողջ Եվրոպայի կյանքը դժոխքի վերածելով:

Ինչ վերաբերում է փողոց դուրս եկած կատալոնացիներին, կամ գոնե՝ անկախության կողմնակիցներին, հարկ է նշել, որ նրանք իրենց դժգոհությունն են արտահայտել ոչ միայն Մադրիդի, այլև Պուչդեմոնի նկատմամբ: «Այդ վախկոտը լքեց մեզ և փախավ, բայց մենք չենք նահանջի», «Ազատությու՛ն Կատալոնիային», «Քաղաքական գործիչները ստախոս են», «Մադրիդը հաշվի՛ կնստի մեզ հետ», «Ռախո՛յ, չես կարող դեմոկրատիա չտալ»՝ ահա այսպիսի պաստառներ են պարզել և համապատասխան կոչեր հնչեցրել կատալոնացիները, որոնց երթին ոստիկանները ոչնչով չեն խոչընդոտել: Իսկ եթե ասվածին հավելենք նաև այն փաստը, որ հինգշաբթի օրը Բարսելոնայի քաղաքային խորհուրդը հատուկ որոշմամբ Պուչդեմոնի լուծարված կառավարությանը լեգիտիմ է ճանաչել, նշանակում է՝ կատալոնացիները շարունակում են բոլոր մակարդակներում չնահանջել և ամեն կերպ պայքարել իրենց իրավունքների համար: Ինչպիսի ընթացքով և արդյունքով՝ ցույց կտա ապագան: