Դասադուլ ընդդեմ տարկետման

Տարկետման փոփոխության դեմ ընթացող դասադուլները, թեկուզև որոշակի բացառություններով, ամեն դեպքում ողջունելի են, ողջունելի այն իմաստով, որ երիտասարդությունը գոնե մի հարցով կարողանում է իրեն որպես քաղաքական սուբյեկտ զգալ: Նման դեպքերում շատերն են շտապում երիտասարդներին մեղադրել կառավարվելու, սխալներ թույլ տալու, իրավական գիտելիքների պակաս ունենալու և այլ մեղքերի մեջ:

Բնականաբար, ցանկացած երիտասարդական բողոք չի կարող լինել բացառապես ակադեմիական սահմաններում, այն էմոցիոնալ է, հաճախ սուբյեկտիվ, երբեմն ձևը գերիշխում է բովանդակությանը, երբեմն առավել կարևոր է բողոքելու առիթը, ոչ թե բողոքի բուն թեման: Եվ ի զարմանս հայ պաշտոնյաների աշխարհի բոլոր երիտասարդական շարժումներն ունեցել են այս հատկանիշները: Այսինքն, այն հատկանիշները, որոնց համար հիմա քննադատում են երիտասարդներին, բնորոշ է ընդհանրապես երիտասարդական շարժում ձևակերպմանը: Այլապես, նրանք կլինեին ոչ թե շարժումներ, այլ կազմակերպված քաղաքական կազմակերպություններ:

Ինչ վերաբերում է կառավարելի լինելուն: Նման շարժումները, որոնք զուրկ են կազմակերպման ուղղահայաց կառուցվածքից բաց լինելով հանդերձ բավական խոցելի են ներթափանցումների համար: Եվ էլի ի զարմանս բոլոր կողմերի, սա ևս ընդունված պրակտիկա է. ցանկացած իշխանություն փորձում է ցանկացած քաղաքական գործընթացից այս կամ այն կերպ տեղյակ լիներ:

Բայց գործակալների առկայությունը չի կարող ապահովել շարժման ակտուալությունը, եթե չկան այն ապահովող բնական պատճառներ: Դրանք կարող են շեղել դետալները, հետաձգել դեպքերը, հետ կանգնեցնել ասենք նախաձեռնողներին, բայց բնական պատճառները նրանք չեն կարող վերացնել:

Այս իմաստով, այսօր ընթացող դասադուլի փաստը ինքնին ողջունելի է: Ցանկացած առիթ, որ կօգնի հայաստանցի երիտասարդներին իրենց զգալ քաղաքական և հասարակական կյանքի սուբյեկտ ողջունելի է լինելու:

Արտակ Ասլանյան