27-30 հոգով 13-15 տեղանոց երթուղայինում. դերասանը՝ երթուղային նստելու փորձության մասին

Դերասան Հրաչ Հակոբյանը բարձրաձայնել է երթուղայինով երթեւեկելու դժվարության մասին: Ըստ նրա՝ դա ուղղակի փորձություն է: Նա գրառում է կատարել ֆեյսբուք սոցիալական ցանցում:

«Մեծարգո՛, վեհաշո՛ւք Երեւանի քաղաքապետ պրն. Տարոն Մարգարյան:
Մինչեւ օրս առիթ չէր ընձեռնվել շնորհավորելու Ձեզ այս պատվաբեր պաշտոնին վերընտրվելու կապակցությամբ: Օգտվելով առիթից՝ ուզում եմ շնորհավորանքներս ուղղել Ձեզ: 

Իսկ այժմ ի գործ:

Այսօր ինչպես ՀՀ հպարտ քաղաքացի, ինչպես Երեւանի արժանապատիվ բնակիչ, մեր քաղաքի մի ծայրից երթուղային տաքսիով ուղեւորվեցի քաղաքի մյուս ծայրամաս: Ինձ ընկերակցում էին ինձ նման եւս 27-30 հպարտ եւ արժանապատիվ համաքաղաքացիներ: Եվ մենք իրար թեւ ու թիկունք տված հաղթահարեցինք այդ փուշ ու տատասկով պատված ճամփան, ինչպես նաեւ 27-30 հոգով 13-15 տեղանոց երթուղայինում չգիտեմ՝ ոնց տեղավորվելու փորձությունը: Իսկ ամենազավեշտալին գիտե՞ք՝ ինչն էր, որ ամբողջ այդ փորձության ընթացքում մասնակիցները, որոնք վստահաբար կարող եմ ասել, որ իրենց վստահության քվեն տվել էին Ձեզ, առանց միմյանց հերթ տալու հիշում էին Ձեզ, եւ իրենց բարեմաղթանքներն էին ուղղում Ձեր հասցեին: Ու այդ թոհուբոհի մեջ ես հիշեցի հայտնի անեկդոտը.
-Ընգեր Դավոն էս շենքում ա՞ ապրում:
-Հա ախպեր, բայց դե ****եմ տենց ապրելը:

Մնացեք բարյավ!

Երեւանի արժանապատիվ կարտոշկա, էէէէէէէհ քաղաքացի Հրաչյա Հակոբյան»,- գրել է նա: