Դասադուլ անող ուսանողներին ՊՆ-ից հրավիրել են հանդիպման. ուզում եք եկեք, չեք ուզում մի եկեք

ՀՀ պաշտպանության նախարարությունից այսօր զանգահարել են «Հանուն գիտության զարգացման» նախաձեռնության անդամներին եւ հրավիրել հանդիպման:

Նախաձեռնության անդամները դրանից առաջ դասադուլ էին հայտարարել՝ պահանջելով պահպանել ներկայում գործող ակադեմիական տարկետման իրավունքի սկզբունքները: Պաշտպանության նախարարության առաջարկած «Զինվորական ծառայության եւ զինծառայողի կարգավիճակի մասին» օրենքի նախագծով առաջարկվում է խիստ սահմանափակել այդ իրավունքը: Բողոքի ցույց անող ուսանողները պահանջում էին նաեւ հանդիպում ու քննարկում պաշտպանության, կրթության եւ գիտության նախարարների հետ:

Ստացված հրավերը, սակայն, նրանք այսօր մերժել են: Նախաձեռնության անդամներից Դավիթ Պետրոսյանը «Հանուն գիտության զարգացման» նախաձեռնության ֆեյսբուքյան էջում ուղիղ երթերով քիչ առաջ պարզաբանեց մերժման պատճառները:

Ընկերների ներկայությամբ նա ասաց, որ երբ փորձել են հասկանալ, թե ինչ ձեւաչափով է լինելու հանդիպումը, լրատվամիջոցներ լինելու են թե չէ, իրենց պատասխանել են, որ բոլորին հրավեր է ուղարկվելու: Մի քանիսին դիմելով, սակայն, պարզել են, որ նման հրավեր չի ստացվել:

Դասադուլ հայտարարած ուսանողները որպես հանդիպմանը չգնալու մեկ այլ պատճառ նշում էին այն հանգամանքը, որ իրենց ամբողջությամբ չի տեղեկացվել մասնակիցների մասին: Ասել են, որ լինելու են ուսխորհուրդների ներկայացուցիչները, հետո պարզվել է, որ հրավիրված են նաեւ ապրիլյան պատերազմի մասնակից երիտասարդները, տարբեր կազմակերպությունների ներկայացուցիչներ:

«Ուսխորհրդի հարցը մի առանձին քննարկման հարց է, չեմ ցանկանում երկար խոսել դրա մասին, բայց նշեմ ուղղակի, որ այս երկու շաբաթվա ընթացքում ոչ մի ուսխորհուրդ պաշտոնական հայտարարությանբ այս օրինագծի վերաբերյալ «կողմ» կամ դեմ» չի խոսել: Նույնիսկ բժշկական համալսարանում երբ ստորագրահավաք ենք արել, փորձել են խոչընդոտել»,- ասաց Դավիթ Պետրոսյանը՝ անընդունելի համարելով մասնակիցների մյուս մասին վերաբերող տեղեկության գաղտնիությունը:

Իրենց մերժման մյուս պատճառն էլ նախաձեռնության անդամների խիստ սահմանափակ թվով մասնակցության հնավորությունն է, այն դեպքում, երբ կարծես հանդիպման պատճառը այսօր կայացած բավական բազմամարդ դասադուլն է, իսկ քննարկման թեման՝ տարկետման իրավունքի սահմանափակումը:

ՊՆ-ից ասվել է, որ հանդիպմանը կարող է մասնակցել «Հանուն գիտության զարգացման» նախաձեռնության անդամներից առավելագույնը չորս հոգի եւ ավելացվել՝ ուզում եք՝ եկեք, չեք ուզում՝ դուք որոշեք:  

«Մենք կարծում ենք, որ մենք նույնպես պետք է մասնակցենք հանդիպման ձեւաչափի ձեւավորմանը, ոչ թե զանգել, դնել ուլտիմատում՝ ուզում եք՝ եկեք, չեք ուզում՝ մի եկեք: Ու վերջում հայտարարություն անել՝ մենք հրավիրել ենք, իրենք մերժել են»,- նկատեց Դավիթ Պետրոսյանը: Ամեն դեպքում հավելեց, որ իրենք էլի պատրաստ են հանդիպման ու խնդիրը քննարկելու: