ՀՀԿ-Ծառուկյան դաշինք կոալիցիայի նախադրյալներ չկան. Սերգեյ Բագրատյան

«Ծառուկյան դաշինքում» չի քննարկվել 2018 թվականին փոխվարչապետի թեկնածու առաջադրելու հարցը: Խմբակցության պատգամավոր Սերգեյ Բագրատյանը Tert.am-ի հետ զրույցում ասաց, որ եթե առաջարկներ լինեն, հավանաբար այդ ժամանակ կուսակցության նախագահը համապատասխան խորհրդակցություններ կանցկացնի:

«Այս պահին որևէ որոշում, քննարկում չկա»,- ասաց Բագրատյանը:

Ինչ վերաբերում է նրան, թե ջանքեր կգործադրե՞ն, որ փոխվարչապետներից մեկն 
իրենց թիմի ներկայացուցիչն լինի, Բագրատյանը հիշեցրեց, որ և՛ կուսակցության ղեկավարը, և՛ խմբակցության պատգամավորները բազմիցս ասել են, որ որևէ բան ինքնանպատակ չեն անում:

Պատգամավորի խոսքով՝ այս պահին դրությամբ դեռևս քննարկում չկա նաև «Ծառուկյան դաշինք» - ՀՀԿ կոալիցիոն համագործակցության հնարավորության մասին, ավելին, ըստ նրա, նախադրյալները նույնպես բացակայում են:

Հարցին՝ չէ՞ որ դաշինքի առաջնորդ Գագիկ Ծառուկյանը կոալիցիոն համագործակցությունը չէր բացառել, Սերգեյ Բագրատյանը պատասխանեց . «Նա չի բացառել, որովհետև Գագիկ Ծառուկյանի փորձը ցույց է տվել, որ ամեն ինչ հնարավոր է, բայց դա չի նշանակում, որ մենք օրակարգում ունենք նման խնդիր: Եթե ապրիլից հետո քաղաքական պատեհություն լինի, «Ծառուկյան դաշինքի» ծրագիրը քննարկման ենթակա լինի այլ ուժերի կողմից, կփորձենք մեր ծրագրի շուրջ համախմբել, քննարկել: Առաջին խնդիրները, որ մենք պետք է լուծենք, հրատապությանն է, իսկ այդ հրատապությունը «Ծառուկյան դաշինքի» 15 կետերում խիստ ընդգծված է: Եթե դրա շուրջ քաղաքական ուժերի կոնսուլտացիաներ տեսնենք, ապա կողջունենք»:

Հարցին՝ այսինքն, եթե ՀՀԿ-ն որոշի քննարկել «Ծառուկյան դաշինքի» 15 կետերը, ուրեմն իրենք պատրա՞ստ են ՀՀԿ-ի հետ կոալիցիոն համագործակցության, Սերգեյ Բագրատյանը պատասխանեց. «Ձեր ասած ձևակերպումը միանշանակ չէ, քանի որ, եթե «Ծառուկյան դաշինքի» ծրագրերը մտնում են գործողության մեջ, նշանակում է, որ համախմբումը պետք է լինի «Ծառուկյան դաշինքի» գաղափարների շուրջ: Մենք պետք է նոր ծրագիր ներկայացնենք ապրիլին՝ նոր կառավարություն ձևավորելու հարցում»