Տարկետումը պահպանելու երթ

Երեկ ԵՊՀ–ի տասնյակ ուսանողներ դուրս էին եկել փողոց, դասադուլ կազմակերպել՝ բոյկոտելով տարկետման իրավունքի սահմանափակումը: Հիշեցնենք, որ մոտ տասը օր առաջ ԱԺ–ն քննարկում էր «Զինվորական ծառայության և զինծառայողի կարգավիճակի մասին» նախագիծը, որի կետերից մեկն էլ վերաբերում էր տարկետման վերացմանը:
Ըստ այդմ՝ 18 տարին լրացած արական սեռի յուրաքանչյուր ՀՀ քաղաքացի պետք է զորակոչվի բանակ: Պաշտպանության նախարար Վիգեն Սարգսյանն այդ օրերին նշում էր, թե տարկետումը չափազանց ընտրովի է, այսինքն՝ բուհ ընդունվողների ընդամենը մի փոքր տոկոսն է ստանում տարկետման իրավունք, իսկ մյուսներն այսպես, թե այնպես ընդհատում են իրենց կրթությունը: Սարգսյանի գնահատմամբ՝ ակադեմիական տարկետումը դառնում է դուռ` դեպի չծառայելը:

Ուսանողների հավաստմամբ, սակայն, նման նախագծի ընդունումը անթույլատրելի է, և կրթության հաշվին բանակ զարգացնելը լուծում չէ: Իրենց բողոքի ձայնը ինչ–որ տեղ կամ ինչ–որ մեկին հասցնելու նպատալով ԵՊՀ–ի ուսանողները նախ առավոտյան սկսել էին շրջել ֆակուլտետներով:– Դասադուլ լինելու ա, տարկետում լինելու ա,– վանկարկումներով մոտենալով ֆակուլտետների մասնաշենքերին՝ կոչ էին անում այլ ուսանողների և դասախոսների նույնպես միանալ այս ակցիային: Դասադուլի մասնակիցների վրա՝ հագուստի, պայուսակների, հեռախոսների վրա ինքնակպչուն թղթիկներ կային՝ «տարկետումը լինելու ա» մակագրությամբ: Ու թեև այդ մասնակիցների մեջ գերակշռում էին աղջիկ ուսանողներ, դա բնական էր՝ նրանք աջակցում ու քաջալերում են իրենց եղբայրներին ու ընկերներին:

Ժուռնալիստիկայի առաջին կուրսի ուսանողները նշում են, որ մասնակցում են այս երթին, որովհետև կարծում են՝ յուրաքանչյուր, թեկուզ մեկ հոգու ներկայությունը շատ կարևոր է ամեն ինչ փոխելու համար:

«Մենք պատրաստվում ենք նաև մնացած բուհերում երթ կազմակերպել, այսօր կհասցնենք, թե ոչ, չենք կարող ասել: Բայց ունենք ուսանողներ նաև այլ բուհերից, օրինակ՝ պետական տնտեսագիտական համալսարանից: Կարծում ենք, որ մեզ կմիանան նաև այլ բուհերի ուսանողներ: Հիմա մեր կոչը վերաբերում է դասախոսներին, ուզում ենք, որ իրենք դուրս գան, միանան մեզ: Ուղղակի հասկանալի պատճառներով իրենք չեն կարող այս պահին մեզ միանալ, գիտենք, որ իրենք էլ ամբողջովին կողմ չեն այս օրինագծին, ու մի քանի հոգի անգամ բացեիբաց այդ մասին արտահայտվել է»,– պատմեցին մեզ Ժուռնալիստիկայի ֆակուլտետի ուսանողները:

Նրանցից նաև տեղեկացանք, որ երեկվա դասադուլի ու երթի նախաձեռնողը նույնպես իրենց ֆակուլտետի ուսանող է՝ Ռուբեն Բանուչյանը: Ուսանողներն ասում են, որ իրենց մեջ նրանք են, ովքեր հետաքրքրված են Հայաստանում տեղի ունեցող իրադարձություններով՝ հավելելով, որ իրենք ու շատուշատ ուսանողներ Ռուբենի կողքին կանգնած են: Ըստ նրանց՝ մինչ այս դասադուլը նախորդ շաբաթվա ընթացքում փոքր մասշտաբով հավաքներ են տեղի ունեցել, տեղեկատվություն հաղորդելու նպատակով:
Հարցին, թե նկատողությունից չեն վախենում, պատասխանեցին ոչ՝ հավելելով, որ ամեն դեպքում ներքուստ մտավախություն ունեն, որ դասախոսների վերաբերմունքի փոփոխություն կարող է լինել. «Բայց էստեղ անհատներ չեն, որ ասեն քեզ կհիշեն, որ հենց դու էիր մասնակցում, որովհետև մենք խմբով ենք ու միասին ուժեղ ենք»:

Դիտարկմանն էլ, թե դասադուլին մասնակցող բոլոր ուսանողներն են իսկապես դեմ այս նախագծին, թե մի մասն օգտվում է առիթից և ուղղակի խուսափում է դասերից, պատասխանեցին՝ ոչ, նշելով, որ իրենք միևնույն է բացակա պիտի ստանան, և եթե խուսափելու լինեին, իրենց միանալու փոխարեն դասի չէին գա:

Հավելենք, որ ԵՊՀ–ի ուսանողները երեկ մոտեցել էին նաև մայր բուհի սև մասնաշենքին, որտեղ նույնպես իրենց միանալ ցանկացող ուսանողներ կային, սակայն միանալ չի հաջողվել, քանի որ բուհի դռները փակ են եղել: