Սովետական միությունը վերականգնելու ՌԴ փորձերը նման են ոտքը կրկին փոցխի վրա դնելուն. Ազատ Արշակյան

Այն, ինչ հիմա կատարվում է Ռուսաստանում, կոչվում է ֆարս. Tert.am-ի հետ զրույցում նման համոզմունք հայտնեց հասարակական, քաղաքական գործիչ, նախկին ԳՄ պատգամավոր Ազատ Արշակյանը, ով համակարծիք է որոշ վերլուծաբանների հետ, թե Ռուսաստանը, մեծ շուքով տոնելով բոլշևիկյան հեղափոխությունը՝ կարոտախտի մեջ է նեոստալինիզմի նկատմամբ և մշտապես ունի Սովետական միության վերականգնման ծրագրեր: 

Ըստ Արշակյանի՝ 100 տարի առաջ այդ հեղափոխությունը ողբերգություն էր ռուսական կայսրության ժողովուրդների համար, որովհետև  քաղաքացիական  պատերազմը, ըստ նրա, մեծ ցնցում էր և լուրջ փոփոխություններ նրանց կյանքում:  

«Այսինքն՝ սա կեղծ է, իսկական չէ, սա ո՛չ հաղթանակի 100-ամյակ է, ո՛չ էլ հիշատակի արարողություն է, ռուսական իմպերիան երկու բան պետք է աներ՝ կամ հաղթանակ տոներ սոցիալական հեղափոխության, ֆիեոդալիզմի  փոփոխության,  կամ ողբար: Հիմա ո՛չ նա է, ո՛չ նա է, դրա համար ես ասում եմ ֆարս է տեղի ունենում»,-ասաց նա: 

Ըստ նրա՝ Սովետական միությունն ինքնին թյուրիմացություն էր: «Չպետք է այդպես լիներ, մեծ թափով սկսվել էր ապագաղութացումը՝ արդեն Շվեդիան ճանաչել էր Նորվեգիայի անկախությունը, Բրիտանիան ճանաչել էր Իռլանդիայի անկախությունը, արդեն Եվրոպայում ազգերի ինքնորոշման  իրավունքը դարձել էր գլխավոր արժեքներից մեկը, իմպերիաները հասկանում էին, որ հարկավոր է հրաժարվել ոչ էֆեկտիվ կառավարման համակարգից և Սովետական միությունը  դարձավ միակ հզոր իմպերիան»,–ասաց նա: 

Ազատ Արշակյանը նշեց, որ մինչ Երկրորդ համաշխարհային պատերազմից հետո 1949թ-ին Հնդկաստանն անկախություն էր հռչակում, մինչև Ֆրանսիան այդ ժամանակահատվածում հրաժարվում էր իր անդրծովյան գաղութներից, Ռուսաստանը գնում էր ծանր գաղութացման ռեժիմով, ինչը, ըստ նրա, անհեթեթ էր։

«Կառավարման բռնապետության այդ համակարգը թյուրիմացություն էր, ինչը ցավոք 100 տարով հետ գցեց Ռուսաստանին Եվրոպայի զարգացած առաջադեմ երկրներից»,-ասաց նա: 

Ըստ հասարակական գործչի՝ այսօր փորձել վերականգնել Սովետական միությունը տարբեր ձևաչափերով՝ նման է ոտքը փոցխի վրա դնելուն: «Այդ փոցխը տրորելու մասին ռուսական ասացվածք կա «наступить на те же грабли», հիմա իրենք նորից  տրորում են փոցխը, որը խփելու է իրենց քիթումռթին, կարծում եմ՝ կխփի, որովհետև նշանները կան»,-ասաց նա:  

Ազատ Արշակյանը սակայն տեղին չի համարում այն դիտարկումները, թե Եվրոպան հետ է գնում սովետական կառավարման՝ լավ կողմերը վերցնելով: «Ինտեգրացիան այլ է, մի բան է ազատ պետությունների կամավոր ինտեգրացիան՝ արժեքային համակարգի վրա հենված և նպատակները: Եվրոպան ընդհանուր արժեքային համակարգ ունի և նրանց նպատակն է նույնը, ՌԴ-ում արժեքային համակարգ չկա, նպատակ որպես այդպիսն չկա: Օրինակ՝ Տաջիկստանի, Հայաստանի, Բելառուսի նպատակներն այլ են, արժեքային համակարգն այլ է, մենք չենք կարող նույն համակարգի մեջ լինել՝ մենք և ղըրղըզները, մենք և ղազախները: Մեզ միավորել կարելի է բռնությամբ, որը և արվում է»,-ասաց նա: