Վիգեն Սարգսյանի պերճանքն ու թշվառությունը

Ուսանողների դասադուլները վերջի օրերի ամենաքննարկվող թեման են: Վաղուց Հայաստանում դժգոհության ալիք չէր եղել, այն էլ երիտասարդների մասնակցությամբ: Թիրախում զինապարտության մասին օրենքոմ փոփոխություններն են: Վիգեն Սարգսյանը ցանկանում է վերացնել տարկետումը, ուսանողները փորձում են պայքարել դրա դեմ:

Այն փաստարկները, թե ուսանողների բողոքը էմոցիոնալ է ու հիմնված է բացառապես դասադուլի միջոցով աչքի ընկնելու վրա, հօդս են ցնդում, երբ դիտում ենք այսօր տեղի ունեցած հանդիպումը Կրթության նախարար Լևոն Մկրտչյանի հետ: Ուսանողները փաստարկներով խեղդեցին նախարարին, ցույց տվեցին, որ ոչ միայն հախուռն են և էմոցիոնալ, այլև գրագետ են:

Ամեն դեպքում, ի պատիվ Լևոն Մկրտչյանի պիտի նշել, որ նա չխուսափեց ընդունել ուսանողներին ու խոսել նրանց հետ նաև ուղիղ եթեր հեռարձակող ԶԼՄ-ների ներկայությամբ: Ի պատիվ, որտև Պատիվ ունեմ ծրագրի հեղինակ Վիգեն Սարգսյանն, օրինակ, ուսանողների հետ հանդիպումը նախաձեռնել էր ծուղակի տեսքով ՝ հրավիրել էր նաև ուսխորհուրդների ներկայացուցիչներին, ինչպես նաև չէր երաշխավորել բոլոր մեդիաների, այդ թվում ուղիղ եթեր հեռարձակող մեդիաների ներկայությունը: Եվ երբ ստացել էր ուսանողների մերժումն այդ ձևաչափով հանդիպելուն, խոսնակի միջոցով զարմանք էր հայտնել, թե ինքը հրավիրեց, իսկ ուսանողները մերժեցին:

Ինչ պիտի անեին ուսանողները ընկնեին ծուղակը: Սա էր Վիգեն Սարգսյանի բանակցային ֆորմատը: Թե այնքան են հեգնել ու ծաղրել դասադուլավորներին, որ սկսել են հավատալ այդ քարոզչական գծին ու անկեղծ հավատացած են, որ ուսանողները միամիտ են ու բացառապես էմոցիոնալ: 

Վիգեն Սարգսյանն այս օրերին քաղաքական կրախ է ապրում: Նրա ինտելեկտուալ, բաց և թափանցիկ գործելաոճի մասին տարածված պնդումները իրար հետևից անէանում են, երբ բանը հասնում է իրական քայլերին: Մնում է հասկանալ, երեք բարձրագույն կրթություն ստացած նախարարին ինչն է խանգարում ուղիղ եթերում բանավիճել ուսանողների հետ: Իսկ միգուցե պարոն Սարգսյանին ավելի հոգեհարազատ է Ռուզաննա Խաչատրյանի ֆեյսբուքյան ստատուսների տրամաբանությունը ու միայն ներիշխանական ինտրիգ-կոմպրոմատ ցիկլի մեջ է նա պատկերացնում իր քաղաքական գործունեությունը:

Արտակ Ասլանյան