Վարչապետի օգնականը խախտեց ուսանողների հետ ձեռք բերված պայմանավորվածությունները

Կառավարությունում այսօր վարչապետի, նախարարների եւ դասադուլ իրականացնող ուսանողների քննարկումից հետո չի պահպանվել նախնական պայմանավորվածությունը: Բանն այն է, որ երբ ուսանողները կառավարության դիմաց բանակցում էին վարչապետ Կարեն Կարապետյանի ավագ օգնական Արամ Վարդեւանյանի հետ, վերջինս խոստացավ հանդիպումից հետո հանրայնացնել վարչապետի հետ սպասվելիք հանդիպման տեսագրությունը: «Հանուն գիտության զարգացման» նախաձեռնության անդամ Դավիթ Պետրոսյանը հատուկ կարեւորեց տեսանյութի հրապարակման պայմանը եւ մանրակրկիտ տեղեկություն ցանկացավ ստանալ, թե տեսանյութը երբ, ինչ ձեւաչափով եւ որքան ծավալով կհրապարակվի:

«Առավելագույնը երկու ժամվա ընթացքում, եթե քննարկումը տեւում է շուրջ մեկ ժամ: Այսինքն՝ քննարկումից հետո 2 ժամվա ընթացքում: Եթե քննարկումը տեւում է կես ժամ, մեկ ժամվա ընթացքում  նյութը հրապարակվում է «ftp.gov.am» կայքում եւ հասանելի է լինելու բոլորի համար, այդ թվում ե՛ւ ձեր, ե՛ւ ԶԼՄ-ների համար: Ամբողջությամբ կձայնագրվի, կտեղադրվի «ftp.gov.am» կայք-էջում եւ  հասանելի կլինի»,- ասաց Արամ Վարդեւանյանը: Հանդիպումը  նախատեսված էր վարչապետի հետ:

Հանդիպման ընթացքում հայտնի դարձավ, որ վարչապետից բացի մասնակցում էին կրթության եւ գիտության եւ պաշտպանության նախարարները: Պայմանավորվածության առաջին խախտումը դա էր, իսկ երկրորդը՝ քննարկման տեսագրության հրապարակումը:

Կառավարությունն իր համապատասխան կայքում հրապարակեց շուրջ 2 ժամ տեւած քննարկման ընդամենը 21 րոպեն, որն ավարտվում է վարչապետի խոսքի կեսից:

Հ.Գ. Նյութը գրելու ընթացքում կառավարության համապատասխան կայքում սկսեցին մաս-մաս տեղադրել հանդիպման տեսանյութերը: