Երևանի քաղաքապետարանն կարևորում է երիտասարդների մասնակցությունը մայրաքաղաքի կառավարման գործում. Տարոն Մարգարյան

Երևանի քաղաքապետ Տարոն Մարգարյանը շնորհավորական ուղերձ է հղել Երիտասարդության համաշխարհային օրվա առթիվ: Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, շնորհավորական ուղերձում ասվում է.

«Սիրելի՛ երիտասարդներ,

սրտանց շնորհավորում եմ Երիտասարդության համաշխարհային օրվա առթիվ: Այն, որ հենց երիտասարդությունն է ցանկացած հասարակության շարժիչ ուժը, անհերքելի փաստ է և ապացուցման կարիք, հաստա՛տ, չունի: Նոր գաղափարներն ու դրանք կյանքի կոչելու համարձակ լուծումները մշտապես եղել և մնում են երիտասարդության կենսակերպի և գործունեության բացառիկ առանձնահատկությունը: Ու նաև հենց ա՛յս առանձնահատկության շնորհիվ է, որ արագ զարգացող աշխարհում ավելի ու ավելի շատ է կարևորվում երիտասարդների ներգրավվածությունը պետությունների կայացման, զարգացման ու հզորացման գործում:

Անշուշտ, բացառություն չէ նաև մեր երկիրը և ուրախությամբ պետք է փաստենք, որ թե՛ տնտեսության տարբեր ճյուղերում և թե՛ կառավարման տարբեր օղակներում շարունակաբար ավելանում է երիտասարդների ներգրավվածությունը, ինչն իր հերթին նպաստում է մեր երկրի կայուն զարգացմանն ու առաջընթացին: Երևանի քաղաքապետարանը ևս առանձնակի կարևորում է երիտասարդների մասնակցությունն ու ներգրավվածությունը մայրաքաղաքի կառավարման գործում, և հետզհետե ավելի ու ավելի շատ հարթակներ են ձևավորվում մասնակցային այդ գործընթացն ավելի առարկայական և շոշափելի դարձնելու, ինչպես նաև երիտասարդների նորարարական գաղափարներն ու նախաձեռնությունները կյանքի կոչելու հարցում գործուն աջակցություն ցուցաբերելու նպատակով: 

Մաղթում եմ անկոտրում կամք և անսպառ եռանդ ձեր նոր գաղափարներն ու մտահղացումներն իրականացնելու ճանապարհին՝ մտայնությամբ, որ ձեր նպաստն եք բերում սեփական երկրի զարգացման ու հզորացման գործում»: