Միքայել Մելքումյան. «Կառավարությանը չի հաջողվել անհետաձգելի միջոցառումներ իրականացնել».«Ծառուկյան դաշինքը» բյուջեի վերաբերյալ առաջարկություններ ունի

2018 թ. Հայաստանի պետական բյուջեի օրենքի նախագիծը հոկտեմբերի 30–ից քննարկվում է Ազգային ժողովի մշտական հանձնաժողովներում: Երկու շաբաթվա ընթացքում հանձնաժողովներում քննարկվեցին փաստաթղթի բոլոր դրույթները: Այս փուլում նախատեսվում են առաջարկներ, որոնց էլ անդրադարձ կկատարվի խորհրդարանական նստաշրջանի ընթացքում:

ՀՀ ԱԺ փոխնախագահ Միքայել Մելքումյանից հետաքրքրվեցինք՝ 2018 թ. բյուջեն սուր քննադատության արժանացրած «Ծառուկյան դաշինքը» պատրաստվո՞ւմ է արդյոք առաջարկություններ ներկայացնել:

«Մենք անպայման ներկայացնելու ենք առաջարկություններ: Կլսենք, թե լիագումար նիստում ինչ ձևով են ներկայացնում նյութը, որովհետև այդ ընթացքում փոփոխությունների է ենթարկվում: Կլսենք և ըստ այդմ կներկայացնենք առաջարկությունները, որոնք, ի դեպ, արդեն պատրաստ են»,– «Փաստ»–ի հետ զրույցում ասաց Մ. Մելքումյանը:

Անդրադառնալով 2018 թ. բյուջեի նախագծին՝ ԱԺ փոխնախագահը շեշտեց, որ այս բյուջեում փորձում են կապիտալ ծախսերը հակադրել սոցիալական ծախսերին, ինչն իրենց համար անընդունելի է: 

«Ընդ որում՝ եթե աշխատավարձերը, թոշակներն ու նպաստները չեն ավելանում, նշանակում է՝ ներքին պահանջարկը ևս չի աճելու: Պետք է հաշվի առնել, որ առանց այդ էլ Հայաստանն աղքատ շուկա ունի, կա աղքատություն և գործազրկություն: Այս ամենը գումարվելու է և, ի վերջո, հանգեցնելու է ներքին պահանջարկի կրճատմանը: Ընդ որում՝ մենք չենք նախատեսում, որ Ռուսաստանից եկող տրանսֆերտները ևս ավելանալու են: Հաջորդ կարևոր հարցն այն է, որ նախատեսված կապիտալ ծախսերի իրականացման համար դեռևս չկան ստերիլ և թափանցիկ մեխանիզմներ, որոնք կապահովեն դրանց արդյունավետությունը: Հասկանալի է՝ դու ուզում ես սոցիալական ծախսի մի մասն ուղղել կապիտալ ծախսերին, բայց ինչո՞վ ես ցույց տալու, որ այն ծախսերը, որոնք անելու ես, լինելու են թափանցիկ և արդյունավետ: Ասվածի վառ օրինակ են օտարերկրյա վարկերը, որոնք այդ առումով ևս խնդիր են առաջացնում»,– ընդգծեց ԱԺ փոխնախագահը:
Միքայել Մելքումյանի դիտարկմամբ՝ տնտեսության իրական հատվածում գյուղատնտեսության և շինարարության ոլորտի անկում ունենք. «Իսկ արդյունաբերության ոլորտում էլ ընդամենը ոչ արտադրողական ապրանքների աճ ունենք, ինչպիսիք են խմիչքը, սնունդը, հանքագործական թանկարժեք և կիսաթանկարժեք քարերը: Այս ամենը ցույց է տալիս, որ մեր տնտեսության դիմադրողականությունը, բնականաբար, համապատասխան մակարդակի վրա չէ: Մարդիկ չեն տեսնում այն տեսլականը, ըստ որի՝ կարող են իրենց աշխատանքով կամ աշխատավարձով որոշակի աճ ունենալ: Այս ամենը, բնականաբար, թևաթափ է անում: «Ծառուկյան դաշինք»–ի մոտեցումներն այլ են: Մենք ասել ենք, որ անհետաձգելի միջոցառումներ են պետք, որոնք կկանգնեցնեն «արյունահոսությունը»՝ արտագաղթը, գործազրկությունը և աղքատությունը: Մենք կարծում ենք, որ կառավարությանը չի հաջողվել իրականացնել այդ անհետաձգելի միջոցառումները: Իսկ հայտարարություններն ու գործը տարբեր բաներ են»:

Հարցին, թե դաշինքը վերջնական որոշում ունի՞, թե ինչպես է քվեարկելու բյուջեի նախագծին, Մ. Մելքումյանը պատասխանեց. «Մենք դեռ պաշտոնական քննարկում չենք իրականացրել և որոշում չունենք: Հաջորդ շաբաթվա ընթացքում պաշտոնական քննարկում է սպասվում: Բայց ֆոնը, բնականաբար, չի կարող դրական լինել՝ կարող է միայն բացասական լինել: Բայց դեռ կքննարկենք, և բոլոր գործոնները հաշվի առնելով՝ մեր որոշումը կընդունենք»:

Աննա Բադալյան