Ադրբեջանցիները կրակել են Բարեկամավանի դպրոցի վրա

Կիրակի՝ նոյեմբերի 12–ին, Բարեկամավան գյուղում ադրբեջանական զինուժի կողմից գնդակոծություն է տեղի ունեցել, որ տևել է մոտ երկու ժամ՝ երեկոյան ժամը 17–ից մինչև 19–ը:

Բարեկամավանի վարչական ղեկավար Ջոնիկ Միքայելյանը «Փաստի» հետ զրույցում նշեց, որ հակառակորդի փամփուշտները վնասել են դպրոցի ապակիներից մեկը: Թեև դպրոցի շուրջը պաշտպանիչ պատ է կառուցված, սակայն պատուհանները բավական բարձր են գտնվում՝ գրեթե առաստաղի ուղղությամբ են: Դրանք, ի դեպ, ձևափոխվել են, ընդամենը 60 սմ երկարություն ունեն, որպեսզի թշնամու գնդակները չվնասեն ներսում գտնվող մարդկանց: Գյուղի վարչական ղեկավարը նաև նշեց, որ գնդակոծության արդյունքում գյուղի և ոչ մի բնակիչ չի վնասվել, սակայն մեկից ընդամենը մի քանի սմ հեռավորության վրա է գնդակն անցել: Վերջինս աշխատելիս է եղել իր տան մոտակայքում և հրաշքով է փրկվել:

Ասում է, թե հիմա ամեն ինչ հանգիստ է. «Մեզ մոտ դա սովորական բան է, կրակում են՝ թաքնվում ենք, դրանից հետո սովորական կյանքը շարունակվում է»:

Հարցին, թե Բարեկամավանի բնակիչները գրեթե ամեն օր կրակի, վտանգի տակ են ապրում, ի՞նչն է համախմբում գյուղացիներին, ի՞նչն է ստիպում հաղթահարել վախը և աշխատել ու արարել, պատասխանեց մեկ բառով՝ հայրենասիրությունը: Հակադարձում եմ՝ եթե միայն դրանով դատենք, շատերը կասեն հայրենասեր ենք, սակայն մեր կյանքն ավելի թանկ է: Սրան էլ այսպես է պատասխանում. «Սա մեր ծննդավայրն է, մենք էստեղ շատ–շատ լավ բաներ ունենք, հիշողություններ ունենք, գերեզմաններ, որ թողնենք գնանք, էնքան բաներ կան կապող»:

Ըստ Միքայելյանի՝ համայնքում արտագաղթ կա, բայց ոչ մեծ տեմպերի հասնող: 1990–ականներին գյուղն ունեցել է 1000 բնակիչ, հիմա մնացել է 180–ը. «Այնպես չի, որ արտագաղթ չունենք, այնպես չի, որ 100%–ով բոլորը մնում են, բայց էս մնացողները իրականում մնացողներ են, չնայած որ մեծամասնությունը ծերեր են»,– նկատեց նա:
Հարցին, թե պետության կողմից ինչ–որ հնարավորություններ ստեղծվում են, որ բացի հայրենասիրությունը նաև աշխատանքը նրանց պահի, հարցով պատասխանեց. «Բայց սահմանի վրա ի՞նչ կարելի է անել, ի՞նչ աշխատատեղ ստեղծել: Ջերմոցներ մեզ մոտ կան, բայց զուտ աշխատատեղ չկա, աշխատանք չկա, պետք է ինչ–որ բան դրվի, էդ էլ գործարար մարդիկ պիտի անեն, բայց իրենք էլ իրենց բիզնեսը սահման չեն տանում: Դա բոլորին էլ հասկանալի է: Պետությունն առաջարկներ արել է՝ էս անենք, էն անենք, բայց դրա համար պետք է ներդրող ու աշխատող լինի»,– հավելեց նա: