Կառավարության որոշումը չի փրկի ընդդիմությանը

ՀՀ կառավարության նոյեմբերի 16–ի նիստի ժամանակ որոշում կայացվեց, որ ՀՀ Ազգային ժողովի 2017 թվականի ընտրությունների ժամանակ 3 և ավել տոկոս ձայն հավաքած կուսակցությունները և կուսակցությունների դաշինքներն այսուհետ բյուջեից գումար ստանան: Այսինքն, վերջին ընտրությունների ժամանակ արձանագրված ցուցանիշներով ընտրություններին մասնակցած բոլոր կուսակցություններից ու կուսակցությունների դաշինքներից 5–ը՝ ՀՀԿ–ն, «Ծառուկյան», «Ելք» դաշինքները, ՀՅԴ և «Հայկական վերածնունդ» կուսակցությունները իրենց հավաքած ձայների համապատասխան կստանան՝ ՀՀԿ–ն 30 մլն դրամ, «Ծառուկյան» դաշինքը 17 մլն դրամ, «Ելք» դաշինքն ու ՀՅԴ–ն 4–ական միլիոն, իսկ Արթուր Բաղդասարյանի ՀՎԿ–ն 2 մլն դրամ:

Պարույր Հայրիկյանը, ով բավականին լավ է հիշում անցյալը, «Փաստի» հետ զրույցում նշեց, որ իր ղեկավարած ԱԻՄ կուսակցությունը, ելնելով միջազգային փորձից, ժամանակին ՀՀ նախագահ Լևոն Տեր–Պետրոսյանին առաջարկել է նման օրենք ընդունել:
«Այսինքն, եթե Սահմանադրությամբ ամրագրված է, որ երկիրը ինքնիշխան, սոցիալական, իրավական և ժողովրդավարական պետություն է, ուրեմն նշված ինստիտուտները պահելու և զարգացնելու համար պետք է պետությունը գումար հատկացնի: 

Հայաստանում վերջին տարիներին այն սահմանափակվում էր ընդամենը ընտրությունների ժամանակ գումար տրամադրելով: Ժամանակին պառլամենտ անցած կուսակցություններին որոշ միջոցներ հատկացրեցին, բայց այդ ավանդույթը չարմատավորվեց, քանի որ ՀՀՇ–ն նպատակ չուներ, որ իրենցից բացի այլ կուսակցություն ասպարեզում երևա: Ընդհակառակը, ամեն ինչ անում էին, որ միայն իրենք մնան»,– ասաց Պ. Հայրիկյանը:

Քաղաքական գործչի կարծիքով՝ կառավարության կողմից ընդունված այս որոշումը նպատակ ունի Եվրոպային ցույց տալ, որ մենք էլ ենք նման բաները հասկանում: Կուսակցությունների ստացած ձայների չափով գումարը տրամադրելն, ըստ նրա, ճիշտ չէ, քանի որ ընտրությունները վաղը մյուս օրը կվերածվեն առևտրի: Դրա համար էլ կուսակցություններին հատկացվող գումարները պետք է չնչին չափով իրարից տարբերվեն: Ինչ վերաբերում է ընդդիմադիր կուսակցությունների՝ ֆինանսներ չունենալու պատճառով քաղաքական դաշտը լքելուն, Հայրիկյանն ասաց, որ իրենց ակտիվ գործունեության տարիներին ավելի դժվար էր գումար հայթայթելու հարցը:

«Լևոն Տեր–Պետրոսյանի ժամանակ օրենք չընդունվեց, բայց երկու փուլի համար կառավարության որոշում ընդունվեց, որը գործեց մոտ երկու տարի: Ինչ վերաբերում է կուսակցությունների գործել–չգործելուն, մենք ընդամենը մեր անդամավճարների միջոցով էինք շատ հարցեր լուծում: Ինչ վերաբերում է ներկային, ապա հիմա կա ավազակախումբ, որը Սահմանադրություն կեղծեց, ընտրություններ կեղծեց: Եվ այդ ամենին պետք է այլընտրանք լինի՞: Հայաստանում չկա ժողովրդավարություն, ի՞նչ այլընտրանքի մասին է խոսքը: Մեզ մոտ վիճակն այնքան անմխիթար է, որ կառավարության հատկացրած անգամ 4–5 միլիոնը չի կարող փոխել իրավիճակը: Բայց իմ կարծիքով, այդ գումարը, որը պետք է հատկացվի պետական բյուջեից, պետք է տրամադրվի այլ տրամաբանությամբ»,– ասաց Պ. Հայրիկյանը:

Արմինե Գրիգորյան