Ծովագյուղի բնակիչները հուսախաբ են եղել

Ներմուծված հնդկացորենը խոչընդոտում է տեղական արտադրողին

Գեղարքունիքի մարզի Ծովագյուղի համայնքի բնակիչները հուսախաբ են եղել: Նրանք հնդկացորեն մշակել, բայց վաճառել չեն կարողանում: «Փաստ»ի թղթակցի հետ զրույցում բողոքեցին հնդկացորենի մշակությամբ զբաղվողները: Բերքատվության ցուցանիշներն այս տարի գոհացուցիչ չեն եղել: Եղանակային պայմանների պատճառով կանխատեսած բերքը չեն ստացել:

Նախորդ տարի մեկ հեկտարից 20 ցենտներ հնդկացորեն են ստացել, այս տարի՝ 8:
«Տարին չորային էր, բերք չկարողացանք ստանալ»,– ասացին նրանք:
Ծովագյուղում այս տարի 150 հեկտար հնդկացորեն են մշակել: 50 հեկտարից բերքահավաք ընդհանրապես չեն կատարել:

«Կարկուտը խփեց, սաղ ջարդեց: Էդ դաշտերին ձեռք չենք տվել ընդհանրապես»,– դժգոհեցին ծովագյուղցիները:

Այստեղ հնդկացորենի վերամշակման գործարան կա: Արդեն վերամշակված հնդկացորենը ծովագյուղցիները իրացնել չեն կարող: Դեռ նախորդ տարվանից էլ կա կուտած, որը գյուղացիների խոսքով, փչանում է ամբարներում ու ավտոտնակներում։
«Մշակել ենք ու չի վաճառվում: Բոլորս հույսեր էինք կապում գործարանի հետ, բայց այդտեղ մենակ վերամշակում են, չեն գնում»,– նշեցին տեղացիները:

Համայնքի ղեկավար Վահրամ Գևորգյանի խոսքով՝ տեղական արտադրողը տուժում է ներմուծվող ապրանքի պատճառով:

«Ներկրված հնդկացորենի գինը 320 դրամ է, մենք ստիպված ենք մեր ապրանքի գինն իջեցնել: 320 դրամով ձեռ չի տալիս, որ մենք վաճառենք: Գոնե 500 դրամ պետք է լինի, որ մենք կարողանանք շահույթ ունենալ»,– շեշտեց Գևորգյանը:

Ծովագյուղում արդեն երկու տարի է ինչ այլընտրանքային մշակաբույսը փոխարինում են ավանդականին: Առաջին տարում 100 հեկտար են ցանել, հետո՝ ավելացրել:

Ըստ նրանց՝ այս մշակաբույսի աճեցումն ավելի ձեռնտու և շահութաբեր է, քան կարտոֆիլինն ու ցորենինը:

«Ցորենի դեպքում՝ հարաբերակցությունը 1:1 է, գարու համեմատ՝ 1:2: Մեր երկրում հիմնականում սերմը ներմուծում ենք, մեր արտադրանքի շնորհիվ կարելի է այլևս չներմուծել»,– փոխանցեցին տեղացիները:
Հնդկացորենի մշակումն իրականացվում է «Եվրոպական հարևանության գյուղատնտեսության և գյուղի զարգացման» (ENPARD) գյուղատնտեսական ծրագրի շնորհիվ: Ծրագիրը մեկնարկել է 2015–ին: Հայաստանի 5 մարզում ստեղծվում է առաջնային արտադրության 40 կոոպերատիվ, որոնցից 33–ը զբաղվում են հնդկացորենի արտադրությամբ:

Հնդկացորենի արտադրություն միայն Ծովագյուղում չի իրականացվում: Մարզի մի շարք համայնքներ ևս անցել են այլընտրանքային մշակաբույսի աճեցմանը:

Իրացման խնդրի առաջ կանգնած գյուղացիների պնդմամբ, սակայն, հաջորդ տարի կնվազեցնեն ցանքատարածությունների թիվը:

«Կդառնա զրո հեկտար: Մարդկանց ոգևորությունն անցավ»,– հավելեց Վահրամ Գևորգյանը:

Կառուցվել է հնդկացորենի մշակման 2 գործարան, որոնք վերամշակում են արտադրանքը: