Տասը օր՝ Ջրարբիի դպրոցը ջեռուցմամբ ապահովելու համար

Երեկ Արմավիրի մարզի Ջրարբի գյուղի դպրոցում դասադուլ էր. ծնողներն իրենց երեխաներին դպրոց չէին տարել՝ դպրոցում ջեռուցման համակարգի բացակայության և դպրոցի անմխիթար պայմանների պատճառով:

Գյուղի՝ դպրոցահասակ երեխաներ ունեցող ծնողները դպրոցի դիմաց բողոքի ակցիա էին կազմակերպել: Ավելի քան 20 տարի դպրոցը չունի ջեռուցում, իսկ տարիների ընթացքում դպրոցի ներքին տեսքը ահավոր վիճակի է հասել՝ որոշ պատուհաններ բացակայում են, պատերը ճաքեր ունեն, սանհանգույցը նորմալ չի աշխատում, իսկ հոսանքի լարերը պատերից են կախված:

Ջրարբիի բնակիչները բազմիցս հարցը բարձրաձայնել են, խնդրել լուծում տալ խնդրին: Տարիներ շարունակ նրանց խոստացել են վերանորոգում իրականացնել, սակայն այդպես էլ սայլը տեղից չի շարժվել:

Այսօր արդեն ծնողները մարտական են տրամադրված եղել: Դպրոցի 261 սաներից միայն 30–ի ծնողներն են իրենց երեխաներին առավոտյան դասի ուղարկել: Նրանք էլ եղել են հիմնականում ուսուցիչների երեխաներ:

«Գյուղի 90%–ը երեխեքին դպրոց չի ուղարկել: Էն 10%–ն էլ դասատուների և խաթր անողների երեխեքն են եղել»,– «Փաստին» տեղեկացրեց դասադուլի կազմակերպիչներից Սարո Մկրտչյանը:

Ծնողներն այսօր վճռական էին, պահանջել էին մարզպետի՝ Աշոտ Ղահրամանյանի հետ հանդիպում: Ի վերջո մարզպետը եկել էր հանդիպելու գյուղի մտահոգ բնակիչների հետ և խոստացել խնդրին 10 օրվա ընթացքում լուծում տալ:

«Դասադուլը դադարեցված է: Մարզպետը եկավ, խոստացավ 10 օրվա մեջ ջեռուցման խնդիրը լուծել՝ ջեռուցման համակարգ տեղադրել: Իսկ դպրոցի վերանորոգման կամ նոր մասնաշենք կառուցելու հարցը կներառեն հաջորդ տարվա նախագծի մեջ»,– հայտնեց մեզ Սարո Մկրտչյանը:

Վերջինս պատմում է, որ մինչ այս էլ շատ են խոստացած եղել, սակայն ամեն ինչ այսպիսի մասշտաբների չէր հասել և լրագրողներ ներկա չէին եղել, ամեն ինչ փոխանցվել էր բանավոր: Նման հանդիպում առաջին անգամ տեղի ունեցավ: Հարցին, թե այս խոստումին հավատո՞ւմ են, պատասխանեց. «Հույսը վերջինն ա մարում, 10 օր հետո կերևա: Եթե չեղավ, էլի նույն վիճակն է լինելու, էլի երեխեքը դպրոց չեն հաճախելու»:

Նշենք, որ մինչ այժմ այս դպրոցի ջեռուցումը իրականացվել է սալյարկայի վառարանների միջոցով: Ինչն իհարկե լավ չէր տաքացնում. «Ուգառ, պաժառ, երեխեքի վրայից սալյարկի հոտ էր գալիս: Ահավոր խնդիր էր, տեսնենք՝ ինչ կլինի»,– նկատեց նա:

Սարո Մկրտչյանի խոսքով՝ Ջրարբիի դպրոցի խնդիրը բազմիցս է բարձրացվել, սակայն այդպես էլ լուծում չէր տրվում. թե՛ տեղի իշխանությունը, թե՛ Կրթության և գիտության նախարարությունը միայն խոստանում էին, բայց բանը գործին չէր հասնում: