Արցախի Հանրապետության ռազմական բյուջեն ևս աճել է. Ռուսլան Իսրայելյան

Արցախի Հանրապետության ռազմական բյուջեն գաղտնի է, սակայն այն ևս աճել է: Այս մասին  Tert.am –ին հայտնեց ԱՀ խորհրդարանի  ֆինանսաբյուջետային և  տնտեսական կառավարման հարցերի մշտական հանձնաժողովի նախագահ Ռուսլան Իսրայելյանը:

«Նույն  բանն է, էլի, ինչ տարբերություն, և ընդհանուր կարող եմ ասել, որ մեր մոտ էլ է  աճել» ,-ասաց արցախցի պատգամավորը:

Հիշեցնենք, որ ՀՀ ռազմական բյուջեն աճել է մոտ 17 տոկոսով:

Նշենք, որ այսօր տեղի է ունեցել ԱՀ Ազգային ժողովի պաշտպանության, անվտանգության և օրինապահպանության հարցերի ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ դռնփակ նիստը: Օրակարգում «ԱՀ 2018 թ. պետական բյուջեի մասին» ԱՀ օրենքի նախագծով ԼՂՀ  պաշտպանության նախարարության, ազգային անվտանգության ծառայության, ոստիկանության եւ արտակարգ իրավիճակների պետական ծառայության ֆինանսավորման հարցերն են եղել:

Ռուսլան Իսրայելյանը, ի պատասխան հարցի, թե ի՞նչ առաջնահերթություններ են քննարկվել, ասաց, որ չի կարող պատասխանել նման հարցերի:

Տարկետման իրավունքի սահամանփակումների հետ կապված էլ արցախցի պատգամավորը նշեց, որ իրենց մոտ բոլորը ծառայում են, այդ թվում` պաշտոնյաների որդիները:

Իմ երեք որդիներն էլ սովորել են Երևանում, առաջին կուրսից հետո բոլորը եկել, ծառայել են,  նոր շարունակել են կրթությունը: Ես կողմ եմ, որ «վունդերկինդներին» տարկետում տալուն, որովհետև եթե Աստված մի արասցե պատերազմ լինի, թշնամին չի հարցնելու` վունդերկինդ է, թե ոչ»,– ավելացրեց արցախցի պատգամավորը:

Անդրադառնալով ՌԴ արտգործնախարար Սերգեյ Լավրովի՝ Ադրբեջանում, Արցախում արված հայտարարություններին, մասնավորապես նաև, որ լավատես չէ, որ հարցը արագ լուծում է ունենալու, վերջինս նշեց. «Ժամանակ չեմ ունեցել, որ ուսումնասիրեմ պարոն Լավրովի հայտարարությունները, բայց ինձ համար Ղարաբաղի հարցը լուծված է»: