Լուկաշինում մթերում չկա, վերավարկավորումը նրանց միակ հույսն է

Արմավիրի մարզի Լուկաշին համայնքում հոկտեմբերի վերջի դրությամբ սեփական եկամուտների կատարողականն ապահովվել է 32,5%–ի չափով, գրում է «Փաստ» օրաթերթը:

Հողի հարկը կարողացել են հավաքագրել պլանավորածի 20,6%–ի չափով: Համայնքի ղեկավար Կարեն Մկրտչյանը «Փաստ» օրաթերթի թղթակցի հետ զրույցում «տարօրինակ» չի համարում, որ նման ցուցանիշ ունեն: Նրա պնդմամբ՝ մինչև տարեվերջ կատարողականը կհասցնեն 90%–ի:

«Կաղամբը դեռ վաճառքի մեջ է: Մարդիկ նոր սկսել են վաճառել: Ես դեկտեմբերի 15–ին նոր կարողանում եմ կատարողական փակել: Այդ ժամանակ միանգամից փոփոխություն է լինում»,– հայտնեց նա:

Կարեն Մկրտչյանի խոսքերով՝ Լուկաշինի «բրենդը»՝ կաղամբը, դաշտերից հավաքվում է այս ամիսներին, հետևաբար գյուղացիներն այս ժամանակ են կատարում նաև հարկային պարտավորությունները: Կաղամբի բերքից գոհ են, բայց գինը վերջին օրերին ընկել է:

«35 դրամով է գյուղացին դաշտից վաճառում: Բայց վերավաճառողներն ուրիշ գնով են վաճառում: Սկզբից թանկ էր՝ 60 դրամով էինք վաճառում: Էժան վաճառում ենք, որ չմնա փչանա: Շուկայական պայմաններ են, գները մեկ էլ տեսնում ես նվազում են: Արդեն բոլորն իրենց բերքը շուկա են հանել, ապրանքը շատ է, դրա համար էլ գինն իջել է»,– ասաց Մկրտչյանը:

 Ցածր գներով բերքի իրացման դեպքում էլ հողագործները մտավախություն ունեմ, որ իրենց չի հաջողվի անգամ ներդրած ծախսերը հետ բերել:

«Մեզ տակը եկամուտ չի մնում: Նույնիսկ հողի հարկի ու ոռոգման ջրի դիմաց ենք պարտք մնում»,– դժգոհեցին լուկաշինցիները:

 Գյուղի 90%–ը կաղամբ է մշակում: Լուկաշինի բնակիչների խոսքով՝ պետությունը պետք է աջակցի, որ կաղամբը վաճառվի, և ժողովուրդը բանկերից վերցրած վարկերը մարի: Այստեղ մի բանկից վարկ են վերցնում մյուսի վարկն են մարում, մյուսից վերցնում՝ մեկ ուրիշը մարում:

«Հիմա հիմնականում վերավարկավորում են անում: Գյուղացիների 20–25%–ը վերավարկավորվում է. նրանք աշնանացանի համար ստիպված են նորից վարկ վերցնել, որպեսզի կարողանան գոյատևել և վարուցանք անել»,– ներկայացրեց Մկրտչյանը: Լուկաշինում այս տարի 350 հեկտար կաղամբ են մշակել: Այսքան էլ նախորդ տարի էր: Հողագործները մտահոգվեցին, որ յուրաքանչյուր տարի բերքի իրացման ժամանակ միայնակ են մնում: Պետությունն իրենց չի օգնում: Գործարանները հրաժարվում են կաղամբ մթերել:

«Արդեն 3–4 տարի է մթերում չի իրականացվում: Դրանից առաջ մթերում կար, հիմա՝ ոչ: Զորամասերին էլ չենք կարող հանձնել, որովհետև մեր կաղամբն այլ տեսակի է: Նրանք հիմնականում Մարտունու շրջաններինն են տանում: Նրանց կաղամբը դիմացկուն է, մերը՝ ոչ»,– մանրամասնեց մեր զրուցակիցը:

Նրանք նաև սրտնեղեցին, որ բերքը տուժում է անմխիթար ճանապարհների պատճառով: Բնակիչների ներկայացմամբ` գյուղի ճանապարհները անբարեկարգ վիճակում են: Տեղացած անձրևների հետևանքով ցեխ է առաջանում:

Առաջացած ցեխակույտերի հետևանքով գյուղացիները դժվարանում են տեղաշարժվել:

«Ճանապարհները քարուքանդ վիճակում են: Մի փոքր անձրև է գալիս՝ ցեխակույտեր են առաջանում ու ցեխոտ փողոցներում քայլել չի լինում: Գյուղի դաշտ տանող ճանապարհները նույնպես վատ վիճակում են: Ցեխի պատճառով չենք կարողանում դաշտ գնալ: Ցեխակույտն այնքան շատ է լինում, որ անգամ մեքենաները չեն կարողանում դաշտ հասնել: Ժամանակ է եղել, որ ցեխն այնքան շատ է եղել, չենք կարողացել դաշտ հասնել ու բերքը դաշտից տուն բերել»,– պատմեցին գյուղացիները:

 

Մանյա Պողոսյան