Բնակիչները շարունակում են խախտել անվտանգության կանոնները

Ջեռուցման շրջանում ջեռուցման սարքերի անփույթ օգտագործման հարցը շարունակում է օրակարգային մնալ: ՀՀ ԱԻՆ պետական հրդեհային և տեխնիկական անվտանգության տեսչության քարոզչության բաժնի պետ Սերգեյ Հայրապետյանն այսօր հրավիրված մամուլի ասուլիսի ժամանակ նշեց, որ ճիշտ է վերջին տարիներին դինամիկան ցույց է տալիս, որ ջեռուցման անվտանգության կանոնները խախտելու հետևանքով առաջացող հրդեհների թիվը թեև նվազել է, սակայն ջեռուցման սարքերի սխալ օգտագործելու հարցը շարունակում է խնդիր մնալ:

Սերգեյ Հայրապետյանը ներկայացնելով վիճակագրությունը նշեց, որ 2016 թվականին նշված պատճառներով գրանցվել է հրդեհի 102 դեպք: Այս տարվա 10 ամիսներին` 53 դեպք է արձանագրվել: Զոհերի և վնասվածք ստացած աձանց թիվը նույնպես նվազել է և եթե նախորդ տարի հրդեհների հետևանքով գրանցվել էր 4 զոհ, 4-ն էլ տուժել էին, ապա այս տարի կա1 զոհ և 5 տուժած:

Սերգեյ Հայրապետյանը նշեց, որ շատ տարածված է ինքնաշեն ոչ գործարանային արտադրության, բաց գալարագծերով սարքերի օգտագործումը, որոնք էլ դառնում են հրդեհի պատճառ: Նա նաև նշեց, որ հաճախ էլեկտրական ջեռուցիչ սարքերը, վառարանները տեղակայում են այլ իրերից անթույլատրելի հեռավորության վրա կամ սարքերն օգտագործում են առանց տակդիրի:

Ջեռուցման սեզոնի ընթացքում խնդիր են գազի թերայրումից թունավորումների, հրդեհների դեպքերը: «Գազպրոմ Արմենիա» ՓԲԸ-ի տեխնիկական տեսչության և գազի վերահսկողության բաժնի պետ Աշոտ Գրիգորյանը նշեց, որ այստեղ 2016 թվականի համեմատ նման դեպքերի ավելացում է նկատվում: 2017 թվականին գրանցվել է 51 պատահար, որի մեջ մտնում են և հրդեհները, և թունավորումները: Նախորդ տարի գրանցվել է 47 դեպք: Այս տարի գրանցվել է 7 մահ, 132 տուժած, նախորդ տարի` 10 մահ 145 տուժած: