Դիտակետում դարձյալ Իրանն ու Հըզբոլլահն են

«Փաստ» օրաթերթը գրում է

Արաբիայի ԱԳՆ ղեկավար Ադել ալ–Ջոբայրին Հռոմի Միջերկրածովյան երկխոսության 3–րդ միջազգային նստաշրջանն իբրև ամբիոն է գործածել հերթական ռազմաշունչ հայտարարությունների համար: «Արաբիան ահաբեկչության ակնհայտ զոհ է: Եվ որպեսզի պայքարեր ծայրահեղական գաղափարների դեմ՝ ստիպված էր տարածաշրջանում հավասարակշռության կենտրոն ստեղծել»,– հայտարարել է Ալ–Ջոբայրին, հավելելով, թե իրենք այժմ կոնկրետ քայլեր են ձեռնարկում՝ ահաբեկչության ֆինանսական աղբյուրները ոչնչացնելու համար:

Զավեշտալին, իհարկե, այն է, որ ահաբեկիչների ցանկից հատկապես ԴԱԻՇ–ի և Ալ–Քաիդայի անուններն են տրվել՝ վերջիններիս հովանավորի գործառույթն Իրանին «շնորհելով»: Եվ դա այն դեպքում, երբ Թեհրանը տարածաշրջանում հենց այդ ուժերի դեմ է հանել իր ողջ արսենալը, իսկ Էր Ռիադի և վերոնշյալ խմբավորումների միջև առկա կապերի վերաբերյալ նույնիսկ դաշնակից ԱՄՆ–ի հետախուզական մարմիններն են բազմիցս արձանագրել:

Չխոսենք արդեն Արաբիայի գահաժառանգ Մոհամմադ բեն Սալմանի՝ Washington Post–ին տված հարցազրույցի մասին, երբ ընդունելով Արաբիայում ծաղկող կրոնական ծայրահեղականության գոյությունը՝ Բեն Սալմանն այն Իրանի իսլամական հեղափոխության «հետևանք» համարեց՝ հավելելով, որ իր ռեֆորմները նաև չափավոր իսլամի հաստատմանն են ուղղվելու: Բայց Ալ–Ջոբայրիին, իհարկե, այս փաստերը չեն հետաքրքրում: Իրանից Լիբանանի թեմային անցնելով՝ նա հայտարարեց, թե այսօր նաև այդ երկիրն է իրենց դիտակետում հայտնվել, և, որ՝ «Բեյրութը կփրկվի միայն այն ժամանակ, երբ Հըզբոլլահն ապառազմականացվի»:

Արաբիայի ԱԳՆ ղեկավարն այդպիսով «գնդակը փոխանցեց» վարչապետ Սաադ ալ–Հարիրին, որն արդեն Բեյրութում «խաղադաշտ դուրս եկավ»: «Ես շատ թշնամիներ ունեմ, որոնց թվում՝ տեղի էքստրեմիստներն ու սիրիական ռեժիմն են: Հենց նրանք էին մահապատժի վճիռ կայացրել ինձ համար»–Al–Masdar News–ի փոխանցմամբ՝ դեկտեմբերի 2–ին հայտարարել է Լիբանանի վարչապետը՝ զայրացած հավելելով, թե Ասադի ներկայի հաջողություններն Իրանի և Ռուսաստանի, ոչ թե Ասադի ձեռքբերումներն են:

Հետաքրքիր է, որ բոլոր այս հայտարարությունները հնչում են 2 անչափ դիտարժան իրադարձությունների համատեքստում: Al–Nashra–ի վկայությամբ՝ Հըզբոլլահի ղեկավար Սեյեդ Հասան Նասրալլան օրեր առաջ գրավոր ուղերձ է հղել Հարիրիին, վերջինից մի անգամ ևս կոնկրետ փաստեր խնդրելով՝ իրենց ուղղված մեղադրանքների համար և հավաստելով, որ ամեն դեպքում կաջակցի նրան:

«Հըզբոլլահը, հանուն Լիբանանի կայունության ամրապնդման և կառավարության պահպանման, ինչպես նաև՝ ելնելով Հարիրիի անվտանգության պաշտպանման անհրաժեշտությունից, բոլոր դեպքերում կհամագործակցի վարչապետի հետ»,–ասված է ուղերձում, որում նաև Հըզբոլլահ–Հարիրի տեսակետների համադրման խոստում է տրվել բոլոր վիճելի հարցերի հետ կապված:

Ավելին, Լիբանանի մեդիայի հավաստմամբ, վերջին օրերի ինտենսիվ շփումներ են սկսվել նաև վարչապետի գրասենյակի տնօրեն Նադեր Հարիրիի և Լիբանանի Հըզբոլլահի գլխավոր քարտուղարի քաղաքական հարցերով տեղակալի միջև, ինչը նշանակում է, որ կամ Հարիրին սոսկ արտաքուստ է շարունակում Արաբիայի գիծը՝ իրականում Հըզբոլլահի հետ համագործակցելով, կամ Բեյրութ է վերադարձել որպես Էր Ռիադի «ական», նպատակ ունենալով քաղաքական ճգնաժամ և, որպես դրա հետևանք, կոնկրետ «պատժամիջոցներ» հրահրել Հըզբոլլահի դեմ:

Ընդ որում, այս համատեքստում է անհրաժեշտ դիտարկել նաև 2–րդ կարևոր իրադարձությունը, որի մասին վերևում ակնարկեցինք: Բանն այն է, որ դեկտեմբերի 2–ի գիշերն իսրայելական օդուժը ռմբակոծել է իր սահմանից 50 կմ հեռավորությամբ գտնվող սիրիական հին բազան, որն, իբր, Իրանն այսօր միաժամանակ զենքի արտադրության գործարան և զինապահեստ է դարձրել:

Իրանական և հըզբոլլահյան աղբյուրներն, ի դեպ, հաստատել են լուրը՝ միաժամանակ նշելով, որ սիրիական բանակին հաջողվել է, այնուամենայնիվ, որսալ ՑԱԽԱԼ–ի 2 հրթիռները: Թուրքական Անադոլուն էլ գրում էր զոհված 12 իրանցիների վերաբերյալ, բայց թե որն է իրականությունը, պարզ չէ: Հայտնի է միայն, որ ՑԱԽԱԼ–ի հարվածը համընկավ Ալ–Ջոբայրի և Հարիրիի հայտարարություններին, ինչպես նաև՝ Իսրայելի վարչապետ Բենիամին Նեթանյահուի ֆեյսբուքյան գրառմանը, որով նա հայտարարեց, թե «թույլ չի տա հրեական պետությունը ոչնչացնելու մտադրություն ունեցող իրանական ռեժիմին միջուկային երկիր դառնալ» և «չի հաշտվի Սիրիայում նման ռեժիմի մշտական ներկայության հետ»…

 

Գոհար Սիմոնյան