Գեղարքունիքի մարզպետարանը մրցանակներ է սահմանել համայնքների ամանորյա զարդարանքների համար

 Գեղարքունիքի մարզպետարանը մրցույթ է հայտարարել մարզի քաղաքային եւ գյուղական համայնքների միջեւ՝ Ամանորի եւ Սուրբ ծննդյան տոների բացօթյա զարդարանքների համար: Ինչպես «Արմենպրես»-ին տեղեկացրին Գեղարքունիքի մարզպետարանի աշխատակազմի կրթության, մշակույթի եւ սպորտի վարչությունից, մրցանակները սահմանված են «Լավագույն քաղաքային համայնքի ամանորյա զարդարանք» եւ «Լավագույն գյուղական համայնքի ամանորյա զարդարանք» անվանակարգերում:
«Արդեն ստեղծվել է մարզպետարանի համապատասխան հանձնաժողով, որը կազմակերպելու է մրցույթի հայտերի ընդունումը, դիտումը եւ գնահատումը: Համայնքներից ստացվելու են տոնական զարդարանքների տեսագրված կամ լուսանկարված նյութերը, որոնք էլ արժանանալու են հանձնաժողովի գնահատականին: Մրցույթի արդյունքները կհրապարակվեն դեկտեմբերի 27-ին, որից հետո սահմանված երկու մրցանակները կտրեն հաղթող ճանաչված 1 քաղաքային եւ 1 գյուղական համայնքներին: Նախորդ տարիներին մեր շատ համայնքներ հետաքրքիր մտահղացումներով ամանորյա բացօթյա զարդարանքներ են ներկայացրել, որոնք, համոզված ենք, կրկնվելու են նաեւ այս Ամանորի տոներին: Կարծում ենք, որ հայտարարված մրցույթն ավելի կշահագրգռի համայնքներին՝ իրականացնելու ավելի ուրույն ու շքեղ ամանորյա զարդարանք»,-նշեց Գեղարքունիքի մարզպետարանի աշխատակազմի կրթության, մշակույթի եւ սպորտի վարչության պետ Գարիկ Բադալյանը:

Խոսրով Խլղաթյան