ՀՀԿ-ի համար բնակչության աղքատ մասն ընդամենը 10 000 դրամանոց ձայն է`ոչ ուտում է, ոչ խմում. Գ.Գորգիսյանը՝ ՀՀԿ պատգամավորի հայտարարության մասին

Եթե սա Հանրապետական կուսակցության պաշտոնական դիրքորոշումն է, ուրեմն մենք լրջագույն խնդիր ունենք։ Անդրադառնալով ԱԺ Հանրապետական կուսակցության խմբակցության պատգամավոր Հակոբ Հակոբյանի հայտարարությանը, թե Հայաստանում «աղքատներին թանկացումը չի վնասում, քանի որ նրանք գումար չունեն և առևտուր չեն անում», Tert.am-ի հետ զրույցում այս մասին ասաց  ԱԺ ընդդիմադիր «Ելք» խմբակցության պատգամավոր Գևորգ Գորգիսյանը։

«Այս պարագայում ուղղակի կարելի է դա մի ձև մեկնաբանել. փաստացի Հանրապետական կուսակցության համար մեր բնակչության՝ որոշ տվյալներով 25 տոկոսը, որոշ տվյալներով՝ 32, իսկ Շիրակի մարզում, պարզվում է, առհասարակ 46 տոկոսը ընդամենը 10 հազար դրաման ձայն է, նրանք ո՛չ ուտում են, ո՛չ խմում, ո՛չ հագնվում, ո՛չ ուսման, բժշկության, ժամանցի կամ որևէ այլ կարիք ունեն։ Ընդամենը 10 հազար դրամանոց ձայն են իրենց համար: Եթե սա Հանրապետական կուսակցության պաշտոնական դիրքորոշումն է, ուրեմն մենք լրջագույն խնդիր ունենք, բայց, հուսով եմ, Հանրապետական կուսակցության որևէ ներկայացուցիչ կմեկնաբանի և գոնե իր պաշտոնական դիրքորոշումը կասի այս հարցի շուրջ»,-ասաց Գևորգ Գորգիսյանը:

Պատգամավորի խոսքով` այն, որ Հայաստանում լուրջ ճգնաժամ է սպասվում 2018 թվականին, արդեն իսկ նշել են «Ելք» խմբակցության բոլոր պատգամավորներն իրենց ելույթներում:

«Մեր խմբակցության ներկայացուցիչներով խոսեցինք, թե ինչ գնաճ է մեզ սպասվում, հարկերի բարձրացում և այլն: Եվ այդ ամենի հետ  աշխատավարձի և նպաստի կամ թոշակի  ոչ մի բարձրացում չի սպասվում հենց ամենախոցելի խավերի համար»,-ասաց պատգամավորը:

Գորգիսյանն առանձնացրեց բյուջետային աշխատողներին՝ ուսուցիչներ, բժիշկներ, ովքեր առանց այդ էլ չգնահատված ցածր աշխատավարձ են ստանում:

«Մեզ մոտ, իմիջիայլոց, գործազրկության տոկոսն ավելի փոքր է, քան աղքատությանը: Այսինքն` մեզ մոտ աղքատների մի մասն ունի աշխատանք, սա է լրջագույն խնդիրներից մեկը։ Մարդիկ աշխատում են, իրենց աշխատածով հանդերձ, միևնույն է, աղքատ են, աղքատության շեմից ներքև են։ Եվ այս իրավիճակում քաղաքական ուժերը, առավել ևս իշխանությունը ինչի՞ համար է՝ ժողովրդի հոգսերը հոգալու։ Եթե նման վերաբերմունք կա, դա անթույլատրելի է»,- ասաց Գորգիսյանը: