3200 բնակիչ ունեցող համայնքը զրկված է ջրից

«Փաստ» օրաթերթը գրում է 

 

Կոտայքի մարզի Լեռնանիստ համայնքի բնակիչները զրկված են խմելու ջրից: Այս մասին «Փաստ» օրաթերթին ահազանգեցին գյուղացիները:

Նրանց պատմելով՝ 1990 թվականից սկսած այստեղ ջուր չի եղել: Համայնքի աղբյուրներից գյուղացիներն ու անասունները հավասարապես են օգտվում:

Լեռնանիստի բնակիչները նշեցին, որ խողովակներ են արդեն բերվել, որպեսզի անասունների համար ջուրն առանձնացվի:

4 աղբյուրից օգտվում են համայնքի 3200 բնակիչները: Լեռնանիստցիների խոսքով՝ իրենք զրկված են կենցաղային տարրական պայմաններից:

«21–րդ դարում մարդիկ ջուր են կրում, ո՞վ է տեսել այսպիսի պայմաններ: Դաշտերն էլ անձրևի հույսին են, անձրև կլինի՝ բերք կստանանք»,– դժգոհեցին նրանք:

Բնակիչները սրտնեղեցին, որ զրկված են իշխանությունների ուշադրությունից: Տարիներով կուտակված խնդիրները լուծում չեն ստանում:

«էրեխեքը չեն կարողանում դաս սովորել, որովհետև սաղ օրը ջրի են գնում: Ձմեռը մատերները սառչում կպչում է դույլին, չեն կարողանում ջուրը տեղ հասցնել: Էլ ջուր կրելու ուժ չունենք: Ով մեքենա ունի, խնդրում ենք, որ մեզ էլ մի քանի տակառ ջուր բերեն: Ինչքան պետք է ջուր կրես, որ կարողանաս խմելու, լողանալու և մյուս կենցաղային հարցերը լուծել»,– բողոքեցին նրանք:

Չնայած ջրի բացակայությանը՝ համայնքի ղեկավար Արտյոմ Հայրապետյանը վստահեցրեց, որ Լեռնանիստից արտագաղթ չկա:

«Մենք հզոր ժողովուրդ ենք, մեր հողը թողնողը չենք: Ճիշտ է՝ դժվար է ջրի հարցը, բայց մենք ամուր ենք: Մեր գյուղն էլ հենց այդ աղբյուրների հիման վրա է ստեղծվել»,– ասաց մեր զրուցակիցը:

Նա նաև հավաստիացրեց, որ առաջիկայում խնդիրը կլուծվի: Բոլոր պատկան մարմինների դռները թակել է: Գիտեն, որ Լեռնանիստում ջուր չկա: Խոստացել են հարցն աչքաթող չանել:

«Բարձրաստիճան մարդիկ խոստացել են, որ խմելու ջրի խնդիրը կլուծվի: Իմ կարծիքով, խնդիրը կկարգավորվի, արդեն իսկ դրական շարժ կա»,– նշեց Հայրապետյանը:

Նախնական հաշվարկով՝ լեռնանիստցիներին ջրով ապահովելը կարժենա 300–500 միլիոն դրամ: Բյուջեով, ըստ համայնքի ղեկավարի, ջրամատակարարում իրականացնել հնարավոր չէ:

«Բյուջեն քիչ է, մեծ ծախսեր անել չենք կարող, միայն մի քանի տոկոս կարող ենք համաֆինանսավորել»,– շեշտեց համայնքի ղեկավարը:

Գյուղացիներից մեկն էլ բողոքեց, որ ջրով լի դույլերը դժվարությամբ են տուն հասցնում, քանի որ փողոցները քանդուքարափ են: Հայրապետյանն ասաց, որ կենտրոնական ճանապարհները՝ 4–5 կիլոմետր, բարեկարգ վիճակում են, իսկ մնացածները չեն նորոգվում խմելու ջրի պատճառով:

«Այդ հարցին բուռն չենք կպնում, քանի որ ջրի խնդիրն է մեզ մոտ առաջնային: Խողովակներն անցկացնելու դեպքում ճանապարհները կքանդվեն»,– նշեց նա:

Այստեղ օրակարգային է նաև ոռոգման ջրի խնդիրը: Մշակված հացահատիկը բերք է տալիս միայն անձրևի շնորհիվ:

1079 հա վարելահողերից մշակվում է ընդամենը 305 հեկտարը: Հողերի անմշակ մնալը գյուղացիները տարբեր պատճառաբանություններով են արդարացնում: Մի մասը՝ ոռոգման ջրի բացակայության, մյուսները՝ տղամարդկանց:

Այստեղ աշխատունակ տղամարդկանց 65%–ը աշխատում և գումար վաստակում են արտերկրում:

 

Մանյա Պողոսյան