Արտաքին քաղաքական դաշտում ՀՀ քայլերը պետք է լինեն համահունչ Արցախի խորհրդարանի և ժողովրդի սպասումներին. Աշոտյան

Արցախի Հանրապետության և Հայաստանի Հանրապետության խորհրդարանների արտաքին հարաբերությունների մշտական հանձնաժողովները դեկտեմբերի 9-ին Արցախի Ազգային ժողովում հրավիրել են համատեղ նիստ՝ հանձնաժողովների ղեկավարներ Արզիկ Մխիթարյանի և Արմեն Աշոտյանի համանախագահությամբ:

Ինչպես «Արմենպրես»-ին տեղեկացրին Արցախի խորհրդարանի լրատվական ծառայությունից, նիստին մասնակցել են ԱՀ ԱԺ նախագահ Աշոտ Ղուլյանը, խորհրդարանական խմբակցությունների ղեկավարները, արտաքին գործերի նախարար Մասիս Մայիլյանը և նախարարի տեղակալները:

Քննարկվել են Հայաստանի և Արցախի խորհրդարանական համագործակցության արտաքին քաղաքական օրակարգին և Հայաստանի արտաքին քաղաքական վերջին զարգացումներին վերաբերող հարցեր:

Նոյեմբերին Երևանում տեղի ունեցած ԱՀ ԱԺ-ՀՀ ԱԺ միջխորհրդարանական համագործակցության հանձնաժողովի նիստի ընթացքում երկու խորհրդարանների միջև պայմանավորվածություն էր ձեռք բերվել կոնկրետ թեմաների հետագա քննարկումները տեղափոխել երկու խորհրդարանների համապատասխան հանձնաժողովների օրակարգ:

Բացելով նիստը՝ ԱԺ նախագահ Աշոտ Ղուլյանը կարևորել է խորհրդարանական դիվանագիտության դերը արտաքին քաղաքական կապերի ընդլայնման գործում և բարձր գնահատել Հայաստանի և Արցախի օրենսդիրների միջև ձևավորված արդյունավետ փոխգործակցությունը:

«Մեր երկու խորհրդարանների համագործակցության ներկայիս մակարդակը թույլ է տալիս ավելի բարձր նշաձող սահմանելարտաքին քաղաքական հարցերում խորհրդարանական մասնակցության համար: Տարբեր առիթներով բազմիցս շեշտել եմ, որ ՀՀԱզգային ժողովը յուրատեսակ կապողօղակ է մեզ համար այլ երկրների խորհրդարանականների հետ շփումների առումով»,-նշել է Աշոտ Ղուլյանը:

Ընդգծելով նման ձևաչափով հանդիպման կարևորությունը՝ Արմեն Աշոտյանը տեղեկացրել է, որ արցախցի գործընկերների հետ ուրվագծել են գործողությունների որոշակի ծրագիր՝ շփումներն առավելագույնս ոլորտային և առարկայական դարձնելու համար:

«Արտաքին քաղաքական դաշտում, հատկապես անվտանգային միջավայրի ձևավորման տեսակետից մեր ձեռնարկելիք քայլերը պետք է լինենհամահունչ Արցախի խորհրդարանի և ժողովրդի սպասումներին»,- շեշտել է Արմեն Աշոտյանը:

ԱՀ արտաքին հարաբերությունների մշտական հանձնաժողովի նախագահ Արզիկ Մխիթարյանը կարևորել է խորհրդարանների արտաքին հարաբերությունների մշտական հանձնաժողովների միջև տարեցտարի կատարելագործվող փոխգործակցությունը, պարբերաբար կազմակերպվող հանդիպումները և տարբեր հարցերի շուրջ ընդունվող հայտարարությունները:

Այնուհետև նիստի մասնակիցները անցել են օրակարգային հարցերի քննարկմանը: «Հայաստանի ու Արցախի խորհրդարանական համագործակցության արտաքին քաղաքական օրակարգը» զեկույցով հանդես է եկել Արզիկ Մխիթարյանը, որում մասնավորապես անդրադարձել է ադրբեջանա-ղարաբաղյան հակամարտության խաղաղ կարգավորման գործընթացին, դրանում Արցախի մասնակցությանը, միջազգային ճանաչման ուղղությամբ կատարվող քայլերին և Արցախը որպես բնականոն կյանքով ապրող և զարգացող երկիր ներկայացնելու անհրաժեշտությանը:

Մտքերի փոխանակության ընթացքում ելույթներով հանդես են եկել Արմեն Աշոտյանը, Հայկ Խանումյանը, Արտակ Զեյնալյանը, Կարեն Բեքարյանը, Դավիթ Մելքումյանը, Շիրակ Թորոսյանը:

Ընդմիջումից հետո համատեղ նիստը շարունակվել է օրակարգային երկրորդ հարցի քննարկմամբ, որը վերաբերում էր Հայաստանի արտաքին քաղաքական վերջին զարգացումներին: Թեմայի շուրջ ցեկույց է ներկայացրել ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը՝  անդրադառնալով Հայաստանի Հանրապետության՝ հարևան երկրների և համաշխարհային ուժային կենտրոնների հետ հարաբերություններում առկա իրավիճակին և սպասվող զարգացումներին:

Քննարկվող թեմայի շուրջ մտքեր են փոխանակել Վարդգես Բաղրյանը, Արտակ Զեյնալյանը, Գեորգի Պետրոսյանը, Շիրակ Թորոսյանը, Արայիկ Աղաբաբյանը, Աշոտ Ղուլյանը և Կարեն Բեքարյանը:

Համատեղ նիստի արդյունքներով հանձնաժողովների նախագահներ Արզիկ Մխիթարյանը և Արմեն Աշոտյանը ճեպազրույց են անցկացրել լրատվամիջոցների ներկայացուցիչների հետ: