ԴԱԻՇ–ը պարտվեց, հուսանք՝ ընդմիշտ

«Փաստ» օրաթերթը գրում է 

 

Դեռևս նոյեմբերի վերջին Իրաքի վարչապետ Հեյդար ալ–Աբադին հայտարարել էր, որ Բաղդադը ռազմական պարտության է մատնել ԴԱԻՇ–ին, սակայն, վերջնական հաղթանակ կհայտարարի երկրի անապատային շրջանները մաքրելուց և Իրաքում ԴԱԻՇ–ի վերջին բաստիոնը՝ Ալ–Անբար նահանգի Ռավա և Էլ–Քաիմ շրջաններն ազատագրելուց հետո:

Այդ ժամանակ փորձագետներից շատերը, ԴԱԻՇ–ի կոնտր–հարձակումն ու շուտափույթ հաջողությունը բացառելով հանդերձ, Իրաքի վարչապետին «մեղադրեցին» շտապողականության մեջ: Ավելին՝ ԱՄՆ Ազգային հետախուզության հակաահաբեկչական կենտրոնի ղեկավար Լորա Շայոնը հայտարարեց, որ վերջին շրջանում ԴԱԻՇ–ն աննախադեպ կերպով է ակտիվացել համացանցում և, համախոհների նոր ու հզոր բանակ հավաքելով, կարող է դարձյալ լուրջ խնդիրներ ստեղծել ոչ միայն տարածաշրջանում, այլև ամբողջ աշխարհում:

Ուղիղն ասած՝ ոչ ոք չի կարող հերքել այն հանգամանքը, որ Իրաքում, շատ շուտով՝ նաև Սիրիայում ԴԱԻՇ–ին պարտության մատնելուց հետո, Բաղդադն ու Դամասկոսն ի վիճակի չեն լինի նաև իսլամիստական արմատականությունն ամբողջությամբ արմատախիլ անել իրենց երկրներում: Այդ փաստը Բաղդադում էլ են հրաշալի հասկանում: Եվ Իրաքի նախագահ Ֆուադ Մասումը հենց դա գիտակցելով ընդգծեց ահաբեկչական ու թաքֆիրական գաղափարների դեմ պայքարը շարունակելու անհրաժեշտությունը, միջազգային հանրությանը կոչ անելով՝ շարունակել Իրաքին ցուցաբերվող աջակցությունը:

Հետևաբար, ո՛չ Լորա Շայոնը, ո՛չ էլ ԱՄՆ Պետանվտանգության և ազգային հարցերով հանձնաժողովի ղեկավար Ռոն Ջոնսոնն (որը համաձայնել էր Շայոնի հետ՝ հավելելով, որ «նոր խալիֆաթն» այժմ տեղակայված է քիբերհարթությունում) որևէ նոր բան չեն ասում: Եվ ոչ էլ նրանց մեջտեղ բերած մարտահրավերներն են նվազեցնում ԴԱԻՇ–ի պարտության հետ կապված ուրախությունը, ինչը դեկտեմբերի 9–ին լիուլի էր դրսևորվում վարչապետ Հեյդար ալ–Աբադիի ելույթում:

«Սիրելիներս, երջանիկ եմ հայտարարել, որ ԴԱԻՇ–ն Իրաքում վերջնական պարտության է մատնված… ողջունում եմ բոլոր հաղթողներին՝ մեր քաջարի բանակին, ոստիկանությանը, անվտանգության ուժերին, Հաշդ աշ–Շաաբի հակաահաբեկչական ուժերին, ռազմաօդային ուժերին, Փեշմերգային, Իրաքի զինված ուժերի բոլոր ստորաբաժանումներին, որոնք օժանդակեցին մեզ՝ ինժեներական ու բժշկական բրիգադներով հանդերձ, ազատագրված շրջանների ամենատարբեր ցեղերին ու տարբեր հավատամքի տեր մեր քաղաքացիներին, որոնք օգնեցին բանակին: Այս հաղթանակը նաև ձերն է, այն բոլորինս է»,– Իրաքի ազգային հեռուստաընկերությամբ հայտարարեց Իրաքի վարչապետը՝ դեկտեմբերի 11–ը համաժողովրդական ուրախության օր հռչակելով:

Բնականաբար, 2014 թվականի հունիսից սկսած՝ ԴԱԻՇ–ի մահվան դրոշի ներքո տառապած իրաքցիներին առանձնապես պետք չէր համոզել ուրախանալ: Ժողովուրդն արդեն քանի օր է՝ Իրաքի բոլոր շրջաններում համաժողովրդական ինքնաբուխ տոնակատարություններ է կազմակերպում, ինչը նշանակում է, որ թաքֆիրական գաղափարախոսությամբ բարբարոս տականքը, ի տարբերություն նախկինի, դժվար թե այսուհետ որևէ աջակցություն ստանա հասարակ մարդկանց կողմից: Մեր տեսանկյունից՝ սա Իրաքի ժողովրդի և ամբողջ աշխարհի ամենակարևոր ձեռքբերումն ու հաղթանակն է, ինչի առիթով սրտանց միանում ենք ԴԱԻՇ–ի պարտության հետ կապված շնորհավորանքներին:

 

Գոհար Սիմոնյան