Շարմազանովի հավատարմության «ռուբիկոնը»

Շարմազանովը այժմ էլ հայտարարել է, թե Սարգսյանի ասածները չեն քննարկվում: Այս անգամ էլ Սարգսյանին անվանել է գերագույն գլխավոր հրամանատար: Մինչ այդ էլ նա համահայկական առաջնորդ էր: Սարգսյանին փորձում են պատկերել այնպիսի գույներով, որոնք որևէ համադրությամբ նրան չեն սազում: Մնում է հասկանալ, արդյոք այդ ամենն արվում է ինքնաբուխ, թե Սարգսյանն է նման օրակարգ իջեցրել:

Խարիզմայի արմատական բացակայությունը Սերժ Սարգսյանի մոտ ստեղծել է այնպիսի իրավիճակ, որ ցանկացած իռացիոնալ բնութագրում նրա հասցեին, որ անում են հանրապետականները ՝ իբրև թե նրան փառաբանելու համար, պարզապես ծիծաղի առարկա է դառնում:

Շարմազանովն, իհարկե, յուր կուսակցության ղեկավարին կարող է անվանել ոնց կամենա: Այստեղ նրա հաճախակի կոմպլիմենտները ոչ թե հոգեբանական, այլ քաղաքական քննարկման թեմա են: Ի վերջո այս սիրառատ բումը, որ ապրում ենք ականատես լինելով Սարգսյանի հասցեին հնչող հաճոյախոսությունների ներքո, ինչ պատճառ ունի

Իսկ պատճառը շատ պարզ է ՝ քաղաքական համակարգի փոփոխությունից հանրապետականները վախենում են ու փորձում են Սարգսյանին ամեն կերպ պահել խաղի մեջ, հասկանալով, որ Սարգսյանի ներկայությունից է կախված թե իրենց գոյությունը, թե իրենց գոյությանը սպառնացող պոտենցիալ ներիշխանական բախումների կարգավորումը: Բախումներ, որոնք կարող են սրբել տանել ՀՀԿ-ն:

Սարգիս Մեսրոպյան