Ինչպե՞ս են մեր քաղաքացիները ջեռուցման հարցը լուծում

«Փաստ» օրաթերթը գրում է

 

Գազի սպառումն աճել է: Այս տարվա ինն ամիսների արդյունքներով՝ Հայաստան է ներկրվել 1 միլիարդ 689,2 միլիոն խորանարդ մետր բնական գազ: Անցած տարվա համեմատ գազի ներկրման ծավալները աճել են 273,5 միլիոն խորանարդ մետրով կամ շուրջ 18%–ով: Աճել են ինչպես Ռուսաստանից, այնպես էլ Իրանից ներկրվող բնական գազի ծավալները: Ըստ տվյալների՝ այս ընթացքում Ռուսաստանից ներկրվել է 1 միլիարդ 354,9 միլիոն խորանարդ մետր բնական գազ, իսկ Իրանից՝ 334,3 միլիոն խորանարդ մետր:

Անցած տարվա նույն ժամանակահատվածում Ռուսաստանից ներկրվել էր 1 միլիարդ 122,2 միլիոն խորանարդ մետր գազ, իսկ Իրանից՝ 293,5 միլիոն խորանարդ մետր:

Գազի սպառման բոլոր խմբերն էլ իրենց ծախսն ավելացրել են: Բնակչությունն ինն ամիսներին սպառել է 448,6 միլիոն խորանարդ մետր բնական գազ: Ըստ դիտարկումների՝ բնակչության կողմից բնական գազի սպառման ծավալների աճը հիմնականում պայմանավորված է այս տարվա առաջին երկու ամիսների՝ հունվար–փետրվարի խստաշունչ ձմեռով, որը պահպանվեց նաև գարնան առաջին ամսին:

Վիճակագրությանը զուգահեռ, «Փաստ» օրաթերթի թղթակիցը փորձել է բնակիչներից պարզել՝ բնակարանները կապույտ վառելիքով են տաքացնում, թե՝ ոչ:

Նոր Նորքի վարչական շրջանի բնակչուհի Նորա Իվանյանն ասաց, որ երկու տարի է՝ գազով բնակարանը չեն ջեռուցում: Այս տարի էլ տաքանալու են հոսանքի միջոցով:

«Գազը շատ թանկ է, տունն էլ մեծ է, ծախսը շատ է նստում, էլեկտրական սալիկներով ամեն մի սենյակը օրվա ընթացքում մի քիչ ենք տաքացնում, կարողանում ենք խնայողություններ անել»,– պատմեց կինը:

Արմավիրի մարզի Ծիածան համայնքում գազ կա, բայց ոչ բոլորն են դրանից օգտվում: Նրանց խոսքով՝ այս տարի ևս բնակարանները գազով չեն տաքացնի:

Այստեղ գազատար է անցնում, իսկ դրա կողքին աթարի բլուրներ են: Ջեռուցման հարցում նրանց օգնության է հասնում աթարը: Այստեղ նաև անասնապահությամբ են զբաղվում, գոմաղբից ստացած աթարն էլ որպես վառելիք օգտագործում:

«Գազը պատուհանի տակով անցնում է, բայց մենք աթար ենք վառում: Ժողովուրդը սաղ ձմեռ էդ աթարով է տունը տաքացնում»,– ասացին նրանք:

Համայնքի միայն 40%–ն է գազով բնակարանները ջեռուցում, այն էլ մի քանի օրով: Հետո նորից անցնում են աթարին: Բնակիչների մեծ մասը ֆինանսական ծանր վիճակում է: Գյուղատնտեսական աշխատանքներ կատարելու համար բանկերից վերցրած գումարները դեռ պարտք են: Մշտական աշխատանք ունեցողների թիվը շատ քիչ է: Ապրուստի միջոցն այստեղ գյուղատնտեսությունից և արտագնա աշխատանքից է գոյանում: Փայտ ու հոսանք էլ շատերը օգտագործելու հնարավորություն չունեն:

«Գազը, էլեկտրաէներգիան շատ թանկ է: Չենք կարող գազով տուն տաքացնել, ամսական ավելի քան 60 հազար դրամ կարժենա, նման ճոխություն թույլ տալ չենք կարող: Ինչո՞վ վառենք, գոնե կանաչին չի վաճառվում, որ գազի փողը կարողանանք տալ»,– նշեցին մեր զրուցակիցները:

Ջեռուցման խնդիրները չեն տարբերվում նաև Արարատի մարզում: Այստեղ համայնքների մեծ մասը ևս գազաֆիկացված է, բայց բնակիչները հույսեր դրա հետ չեն կապում:

«Այգում ծառեր կան, դա ենք կտրել ու մի քիչ էլ փայտ ենք առել, որ կարողանանք յոլա գնալ: Տանը մշտական աշխատանք ունեցող չկա, որ ես գազ վառեմ, չեմ կարող ամեն ամսվա գումարը վճարել»,– ասաց Դիմիտրով համայնքի բնակչուհին:

Բնակիչները դժգոհեցին, որ ցածր եկամուտներով հազիվ կարողանում են սննդամթերքի հարցը լուծել, ուր մնաց՝ ջեռուցման:

 

Մանյա Պողոսյան