Ինչպե՞ս են համայնքներն ամփոփում գյուղատնտեսական տարին

«Փաստ» օրաթերթը գրում է

 

 

Տարին Արմավիրի մարզի Արտաշար համայնքի բնակիչների համար ծանր էր: Բնակիչները միաբերան փաստեցին՝ գյուղտարին իրենց ոչ մի օգուտ չի բերել: Ոռոգման ջրի պատճառով եկամուտ ստանալ չեն կարողացել:

«Ամառվա կեսին, 40 աստիճան շոգին շաբաթներով ջուր չեն տվել: Բույսը չորացել է, պտուղ չի տվել»,– «Փաստ» օրաթերթի թղթակցի հետ զրույցում պատմեցին Արտաշարի բնակիչները:

Գյուղացիները պատմեցին, որ երկրոդ տարին է, ինչ առանց եկամուտ են մնում: Նախորդ տարի կարկուտը նրանց մեծ վնաս հասցրեց:

«Շատ վատ վիճակ էր, փող չունեինք նորից վարուցանք անելու, բան էլ չկարողացանք հողամասից ստանալ, վաճառել: Վատագույն տարիներից մեկն էր այս տարին: Ցրտահարություն եղավ, մեզ էլ բերք չմնաց»,– դժգոհեցին հողագործները:

Արտաշարում առանց այն էլ մարդիկ քիչ են հող մշակում: Տարեկան մոտ 50 հա հողատարածք վերածվում է անապատի: 420 հա վարելահողից մոտ 320 հա աղակալված է: Համայնքն ի զորու չէ սեփական միջոցներով իրականացնել աղազերծման աշխատանքները: Արդյունքում տարեցտարի ավելանում է աղակալված հողատարածքների թիվը: Բնակիչների խոսքով՝ աղակալված հողերը կարող են անմշակ չմնալ, եթե համայնքում առատ ոռոգման ջուր լինի, իսկ ջրի հարցը սուղ է, ինչն էլ նպաստում է, որ հողերը խոպան մնան։

Ի տարբերություն Արտաշարի՝ Արարատի մարզի Ոստան համայնքում դժգոհության առիթ չեն տեսնում: Այգեգործությամբ զբաղվող համայնքում խաղողի մթերման խնդիր այս տարի չի եղել: Թեև գործարանները 10 դրամով նվազեցրել են մթերման գինը, բայց խաղողագործը գումարը տեղում ստացել է: Հարկերն ու տուրքերն էլ վճարում է:

«Մոտ մեկ միլիոն դրամ է մնացել, որ բյուջեն 100%–ով կատարենք: Տարին վատ չէր, լավ էր: Մի քանի հոգի դեռ նախանցյալ տարվա խաղողի գումարները պետք է ստանան, մնացածը խնդիր չունեն»,– ներկայացրեց Ոստան համայնքի ղեկավար Հակոբ Խաչատրյանը:

Սերժ Սարգսյանն իր ելույթում ասաց, որ համայնքապետերը հաճախ բերքատվության ցուցանիշները սխալ են հայտնում: Ոստանի ղեկավարը պնդեց՝ երբևէ նման քայլի չի դիմել: Ինչ կա, այն էլ ասել է, խաբելու պատճառ չունի:

«Մեր գյուղում մենք կոնկրետ թվերով միշտ ներկայացրել ենք: Այս տարի էլ անասունների թվաքանակը շատ ճշգրիտ հայտնել ենք: Մենք մեր թվերին տիրապետում ենք, դա Ոստանին չի վերաբերում»,– շեշտեց նա:

336 խոշոր եղջերավորների գլխաքանակ են փոխանցել մարզպետարանին: Անասնագլխաքանակը նախորդ տարվա համեմատ չի փոխվել: Մսամթերքի իրացման խնդիր էլ չունեն:

«Տարի է եղել, որ միսը մնացել է, բայց Նոր տարվա համար արդեն սկսել են գներով հետաքրքրվել»,– փոխանցեց նա:

Վերին Դվինում բուսաբուծության ոլորտում բարձր ցուցանիշ է գրանցվել: Արձանագրված փաստն արդեն հայտնել են: Համայնքի ղեկավար Լյուդմիլա Պետրովան զարմանում է՝ ինչու պետք է սխալ տվյալներ ներկայացնեն:

«Իմ համայնքում նման խնդիր չի եղել»,– պնդեց մեր զրուցակիցը:

Ամեն տարի 200 հեկտար լոլիկ է այստեղ մշակվում: Մթերման հետ կապված խնդիրներ այս սեզոնին չեն առաջացել:

«Լոլիկը շատ աշխատանք է պահանջում, ինքնարժեքը բարձր է, մարդիկ չեն կարողանում եկամուտ ստանալ: Բնակիչը ծայրից ծայր մի կերպ հասցնում է, հավելյալ գումար իրեն չի մնում»,– նշեց նա:

Ոռոգման ջրի խնդիր էլ չեն ունեցել: Ոռոգումից տուժել են Արագածոտնի մարզի Հնաբերդ համայնքում: Բացասական արդյունքով են տարին փակում: Այստեղ երաշտն է իր սև գործն արել:

«Ինչ եղել է, սաղ վառվել, թափվել է: Հուլիս– օգոստոս ամսին ոնց որ աշուն լիներ: Գարու ու ցորենի բերք չկար, չորացել էր, որովհետև մի քանի ամիս անձրև չի եկել»,– ասացին հնաբերդցիները:

Այստեղ ոռոգման ջուր չկա. վարելահողերը մշակվում են անձրևի հույսով: Այս տարի, սակայն, չորային է եղել և տեղումներ չեն եղել:

«Տնամերձերում ջուր կա, բայց դրանք փոքր են` ամեն մեկը մի 300–400 մետր հող հազիվ ունենա: Դաշտի հողերը չեն ոռոգվում: Խոտն էլ է չորացել, հացահատիկն էլ, կարտոֆիլն էլ»,– մտահոգվեցին մեր զրուցակիցները:

Մանյա Պողոսյան