Արևային կայանը՝ գյուղում աշխատատեղի խնդրի լուծում

«Փաստ» օրաթերթը գրում է

 

Հայաստանում գործող արևային համակարգային կայանների քանակն աստիճանաբար ավելանում է։ Վերջին երեք ամսում շահագործման է հանձնվում մինչև 1 մեգավատտանոց երրորդ կայանը։

Օրերս Արմավիրի մարզի Շենիկ համայնքում պաշտոնապես բացվեց «Գրին Էներջի» արևային կայանը։ Այն կառուցվել է «Բաղրամյանշին», «ԱԿԲԱ Լիզինգ» և «Շտիգեն» ընկերությունների համագործակցությամբ: Ներդրվել է շուրջ 800 հազար դոլար: Կայանը բաղկացած է 3124 պոլիկրիստալային արևային վահանակներից և 37 արևային ինվերտորներից։ Այն կկարողանա արտադրել տարեկան 1600 կՎտ/ժ էլեկտրաէներգիա:

Արարատի մարզի Շենիկ համայնքի ղեկավար Գուրգեն Մինասյանը «Փաստի» հետ զրույցում նշեց, որ իրենց գյուղի համար այս նոր կայանի գործարկումն առաջին հերթին աշխատատեղի խնդիր է լուծում:

«Իհարկե սեփականատերն ինքն է եկամուտ ստանում, սակայն թե՛ կառուցման ժամանակ բանվորական ուժն էր գյուղից և թե՛ արդեն հիմա հերթափոխով մեր գյուղից հինգ հոգի աշխատում են: Կայանը մասնավոր է, Էլցանցին է տալիս հոսանքը»,– նշեց գյուղապետը:

Նշենք, որ Հայաստանում այս պահին ընթացքի մեջ են ևս ութ կայանների կառուցման աշխատանքներ, որոնց շահագործումը նախատեսված է հաջորդ տարի:

Հիշեցնենք նաև, որ Հանրային ծառայությունները կարգավորող հանձնաժողովը տրամադրել է մինչև 1 մեգավատտ հզորությամբ արևային համակարգային կայանի կառուցման 11 լիցենզիա, որոնց գումարային հզորությունը կազում է շուրջ 10 մեգավատ։

 

Քրիստինա Տեր-Մաթևոսյան