Միքայել Մելքումյան. Գագիկ Ծառուկյանի նախաձեռնած այցն Արցախ աննախադեպ է

Եվրոպական մի շարք երկրների պահպանողական և ռեֆորմիստական քաղաքական ուժերի ներկայացուցիչներ ու տարբեր երկրների խորհրդարանների պատգամավորներ «Ծառուկյան» դաշինքի առաջնորդ Գագիկ Ծառուկյանի նախաձեռնությամբ այցելել են Արցախ:

Խոսելով այցի նշանակության, տպավորությունների և արդյունքների մասին, «Փաստ»-ի հետ զրույցում ՀՀ Ազգային ժողովի փոխնախագահ Միքայել Մելքումյանն ընդգծեց, որ Գագիկ Ծառուկյանի նախաձեռնած այցն Արցախ իր բնույթով աննախադեպ էր:

«Թվով 18 հոգի՝ Եվրոպայի պահպանողականների և ռեֆորմիստների դաշինքի պատգամավորները, ներկայացուցիչներն ու նաև կուսակցությունների ղեկավարներն Արցախ են մեկնել պարոն Ծառուկյանի հրավերով:

Այցին նախորդել էր Գ. Ծառուկյանի և մեր կուսակցության պատվիրակության նոյեմբերին կատարած այցը Բրյուսել՝ Եվրախորհրդարան: Արցախ այցելությունն աննախադեպ եմ համարում, որովհետև երևի առաջին դեպքն է, որ նման թվով և այդպիսի ներկայացուցչական կազմով այց է կատարվում Արցախ:

Այն երկրի պետականաշինության, Արցախի հարցի խաղաղ կարգավորմանը նպաստելու և աջակցելու առումով աննախադեպ է: Իսկապես քաղաքական բարձր մակարդակ ապահովող այցելություն էր: Պատվիրակությանն ընդունեց Արցախի նախագահ Բակո Սահակյանը: Հանդիպում եղավ նաև Արցախի Ազգային ժողովի պատգամավորների հետ: Արտերկրի մեր գործընկերները ելույթ ունեցան Արցախի Ազգային ժողովում և իրենց վերաբերմունքն արտահայտեցին»,-ասաց ԱԺ փոխնախագահը:

Միքայել Մելքումյանը նշեց, որ պատվիրակության անդամները զբոսնել են նաև Ստեփանակերտի փողոցներով.

«Նրանք տեսան, որ Ստեփանակերտը խաղաղ քաղաք է: Տեսան, որ Արցախն ունի ժողովրդավարական բոլոր ինստիտուտները: Այդ ամենից հետո մենք տարբեր զրույցներ ենք ունեցել պատգամավորների հետ: Նրանք բավականին տպավորված էին: Կարծում եմ՝ առհասարակ այցն իր աննախադեպությամբ շատ կարևոր է: Նաև կարծում եմ, որ ի շահ մեր պետության և մեր Արցախի հանրապետության, պարոն Ծառուկյանը շարունակելու է այդ ազգանվեր գործունեությունը»:

Հարցին, թե ո՞րն է Գագիկ Ծառուկյանի նախաձեռնությամբ իրականացված այցի քաղաքական ամենակարևոր ուղերձը, Մ. Մելքումյանը պատասխանեց.

«Քաղաքական ամենամեծ ուղերձը հետևյալն էր. Եվրոպայի և աշխարհի տարբեր երկրներին պետք է ցույց տալ, որ Արցախի ժողովուրդը կերտում է իր պետությունը, որ այնտեղ մարդիկ արարում են, այնտեղ խաղաղ բնակչություն է ապրում, զինված կամ հարձակողական որևէ նկրտում չկա:

Կա ժողովուրդ, ով ապրում է իր հայրենիքում, կառուցում է իր երկիրը, և միայն ու միայն պետք է հարգել Արցախի ժողովրդի իրավունքը: Պարոն Ծառուկյանը նաև Արցախում շեշտեց, որ աշխարհը պետք է ընդունի Արցախի ժողովրդի որոշումը: Միայն ժողովուրդը կորոշի իր ճակատագիրն ու իր ապագան:

Գ. Ծառուկյանի ամենամեծ առաքելությունն այն է, որ նա մեծագույն աջակցություն է ցույց տալիս թե՛ Արցախի և թե՛ մեր ողջ ժողովրդին ու պետությանը. այս պատգամավորների այցի միջոցով մի քանի քայլ առաջ է կատարվում: Իրենք իրենց երկրներում պետք է համոզվեն, որ, այո, օբյեկտիվ իրավիճակն այն է, ինչն իրենք իրենց աչքերով են տեսել: Այսինքն՝ ավելի լավ է մեկ անգամ տեսնել, շփվել, քան հարյուր անգամ լսել: Սա է եղել հիմնական քաղաքական մեսիջը»:

Միքայել Մելքումյանը շեշտեց, որ ծրագիրը շարունակական է լինելու. «Գագիկ Ծառուկյանը ծրագրային գործունեություն է իրականացնում: Ծրագիրը բազմապրոֆիլ է լինելու՝ միայն այցելություններ չեն լինելու»:

ԱԺ փոխնախագահն ընդգծեց, որ Եվրոպայի պահպանողականների և ռեֆորմիստների դաշինքը 3-րդ քաղաքական ուժն է.

«Այդ քաղաքական լրջագույն ուժը լինելով՝ մեծ ազդեցություն կունենան: Արցախ այցելած պատգամավորները Բրյուսելում կներկայացնեն այն, ինչ որ տեսել են: Նրանցից յուրաքանչյուրը մեկ առանձին կուսակցություն է ներկայացնում: Ճիշտ է, նրանք դաշինքի մեջ են, բայց նրանք Մեծ Բրիտանիայում, Հնդկաստանում, Կանադայում, Գերմանիայում և տարբեր երկրներում ներկայացնում են իրենց կուսակցությունները:

Այն, ինչ իրենք իրենց աչքով են տեսել, ոչ միայն Եվրախորհրդարանում, այլև իրենց ազգային պառլամենտներում կներկայացնեն: Ու հետո, չէ որ իրենք, բացի պատգամավոր լինելուց, նաև տարբեր պատվիրակությունների անդամներ են: Մեկը ՆԱՏՕ-ի վեհաժողովի, մյուսը՝ Եվրախորհրդարանի, ԵԽԽՎ-ի, կամ՝ Եվրանեսթի: Այսինքն՝ պատկերացրեք, թե խաչաձև ինչ ազդեցություն է առաջանալու:

Իսկ մեր խնդիրն այն է, որ մասնակցություն ունենալով տարբեր միջազգային պատվիրակություններում, կարողանանք համապատասխան մակարդակի բերենք այդ ռեզոնանսը: Մենք մեր ելույթներով, ինչպես նաև մեր շփումների մեջ պետք է ճիշտ փաթեթավորենք այդ ամենը: Բացի այդ, պետք է շարունակենք մեր գործընկերային հարաբերությունները: Հյուրերի հետ կապը մենք չկորցրեցինք: Շարունակելու ենք նրանց հետ հանդիպել արտերկրում, իսկ որոշ ժամանակ հետո նորից ենք հրավիրելու: Միգուցե իրենք էլ կգան իրենց մյուս գործընկերների հետ: Եվ այսպես, մի մեծ շղթայական բնույթ կրող միջոցառում կունենանք, որը շարունակաբար կիրականացնենք»:

 

Աննա Բադալյան