Հարսանիք է սպասվում. քավորը Հովիկ Աբրահամյանն է

2016թ-ի ապրիլի 30-ին հակառակորդի կողմից մահացու հրազենային վիրավորում ստանալու հետևանքով զոհվեց Տավուշի մարզի Զորական գյուղի բնակիչ Գարիկ Մովսիսյանը: Ապրիլյան քառօրյայում հերոսացած 20-ամյա երիտասարդը հետմահու պարգևատրվեց Հայաստանի Հանրապետության «Արիություն» մեդալով:

Հերոսի ընտանիքը գտնվում էր սոցիալական ծայրահեղ ծանր վիճակում, բնակվում էր անմխիթար պայմաններում: Գարիկի ընտանիքին այցելած վարչապետ Հովիկ Աբրահամյանը խոստացավ, որ նոր տուն կկառուցի հերոսի ընտանիքի համար: Անմիջապես սկսվեց տան շինարարությունը, ֆինանսական խնդիրները Հովիկ Աբրահամյանը շարունակեց լուծել նաև իր հրաժարականից հետո. և հարմարավետ առանձնատունը արդեն ավարտին է հասցվել և շահագործվում է:

Հովիկ Աբրահամյանը նաև պատրաստակամություն էր հայտնել, որ եթե հերոսի եղբայրն ամուսնանա, ինքը կդառնա հարսանիքի կնքահայրը։ Գյուղացիները ասում էին նաև, որ Հ. Աբրահամյանը վարչապետի պաշտոնը թողնելուց հետո էլ հաճախ այցելել է Գարիկի ընտանիքին ու հետաքրքրվել նրանց որպիսությամբ։

Եվ ահա, մեր տեղեկություններով, նախկին վարչապետի սերտ կապը ապրիլյան պատերազմի հերոսի ընտանիքի հետ նոր փուլ է մտնում. առաջիկա ուրբաթ օրը՝ դեկտեմբերի 22-ին, տեղի կունենա Գարիկի եղբոր հարսանեկան արարողությունը, որի կնքահայրը, խոստման համաձայն, կլինի Հովիկ Աբրահամյանը: Զորականցիները ՓԱՍՏ-ի հետ զրույցում նշեցին, որ Նոյեմբերյանի տարածաշրջանում այս տեղեկությունը մեծ ոգևորությամբ են ընդունել՝ և հերոսի ընտանիքի համար առանձնատուն կառուցելը, և հերոսի եղբոր ամուսնությունը, և, իհարկե, հարսանիքի քավորի խոստումների աներկբա կատարումը թե վարչապետությունից առաջ, թե դրանից հետո...

Ա. Գրիգորյան