Ահազանգում է դուստրը. բակի տղաները ծեծել են հորը, ապա հարձակվել իր ու քրոջ վրա

Հունիսի 16-ին, ժամը 17.10-ին, ոստիկանության Երեւան քաղաքի վարչության օպերատիվ կառավարման կենտրոնից Կենտրոնականի բաժնում հաղորդում է ստացվել, որ իրենց է զանգահարել Սոնա Մ.-ն եւ հայտնել, որ Երեւանի Պարոնյան փողոցի թիվ 25Ա շենքի բակում բակի տղաները ծեծել են իր հորը, իսկ հիմա հարձակվել են իր եւ քրոջ վրա, իսկ ժամը 17.15-ին Սոսե Մ.-ից ահազանգ է ստացվել, որ Պարոնյան փողոցի թիվ 28/Ա հասցեում կռիվ է:

Ոստիկանության մամուլի ծառայությունից հայտնում են, որ նույն օրը, ժամը 19.20-ին, հիվանդանոցից հաղորդում է ստացվել, որ «գագաթ-ճակատային շրջանի սալջարդ, պատռած վերք, կրծքավանդակի թիկնային մակերեսի եւ վերջույթի փափուկ հյուսվածքների քերծվածքներ, ծոծրակ գագաթային շրջանի փափուկ հյուսվածքների սալջարդ քերծվածքներ» ախտորոշմամբ բուժօգնության է տեղափոխվել 64-ամյա Հակոբ Մ.-ն, որը հայտարարել է, որ բակում իրեն ծեծի են ենթարկել հարեւանների տղաները:

Մեկնած օպերատիվ խմբին ժամը 21.30-ին Հակոբ Մ.-ն հաղորդում է տվել, որ ժամը 17.00-ին Պարոնյան փողոցի թիվ 28/Ա շենքի բակում իր հարեւանը` 24-ամյա Հայկ Ջ.-ն, վիճաբանության ժամանակ, հարվածներ է հասցրել իր գլխին եւ պատճառել վնասվածքներ:

Նույն օրը, ժամը 22.00-ին, Հայկ Ջ.-ն հաղորդում է տվել, որ ժամը 16.00-ին նույն վիճաբանության ժամանակ Հակոբ Մ.-ն փայտի կտորով հարվածել է իր դեմքին եւ պատճառել վնասվածք:

Նշանակվել են ԴԲՓ-ներ:

Կատարվում է հետաքննություն: