Մարզերում ընտրություններ կլինեն

«Փաստ» օրաթերթը գրում է

 

Գարունը հանրապետության մի շարք մարզերում թեժ կլինի: Մարտի 11–ին հանրապետության որոշ համայնքներում Տեղական ինքնակառավարման մարմնի ընտրություններ են նշանակված: 14 համայնքներում համայնքի ղեկավար կընտրեն, իսկ 16–ում՝ ավագանու անդամներ:

«Փաստը» Կենտրոնական ընտրական հանձնաժողովից տեղեկացավ, որ համայնքի ղեկավարի ընտրություններ են նշանակված Կոտայքի մարզի Հացավան, Արագածոտնի մարզի Դդմասար, Արարատի մարզի Եղեգնավան, Դարբնիկ, Զորակ, Խաչփար, Հայանիստ, Նիզամի, Սայաթ–Նովա, Սիս, Նորամարգ, Արմավիրի մարզի Մեծամոր, Լոռու մարզի Լեռնավան և Դեբեդ համայնքներում:

Իսկ ավագանի կընտրեն Արմավիրի մարզի Ծաղկալանջ, Տավուշի մարզի Ազատամուտ, Արարատի մարզի Եղեգնավան, Դարբնիկ, Զորակ, Խաչփար, Հայանիստ, Նիզամի, Նորամարգ, Սայաթ– Նովա, Սիս, Սիփանիկ, Արմավիրի մարզի Դաշտ, Լոռու մարզի Լեռնավան, Դարպաս և Շիրակի մարզի Վարդաքար համայնքներում:

Տավուշի մարզի Ազատամուտ համայնքում ավագանու ընտրությունը արտահերթ տեղի կունենա:

2017 թվականի օգոստոսի 18–ին վաղաժամկետ դադարեցվել էին համայնքի ավագանու անդամներ Մարգարիտա Ալթունյանի, Ալիկ Էլարյանի, Հակոբ Մելիքբեկյանի, Լևոն Սարիբեկյանի և Սևակ Գասպարյանի լիազորությունները՝ «Տեղական ինքնակառավարման մասին» ՀՀ օրենքի 22–րդ հոդվածի 1–ին մասի 7–րդ կետի (մեկ տարվա ընթացքում անհարգելի պատճառով բացակայել են ավագանու նիստերի ավելի քան կեսից) հիմքով:

Այդ հանգամանքից ելնելով՝ անհնարին է դարձել ավագանու նիստերի հետագա անցկացումը:

Թեկնածուների գրանցումը կսկսվի փետրվարի 9–ից և կավարտվի փետրվարի 14–ին մինչև ժամը 18:00–ն:

Թեկնածուներն ինքնաբացարկի դիմում կարող են ներկայացնել մինչև մարտի 1–ը ժամը 18:00–ն:

Իսկ նախընտրական քարոզարշավը մեկնարկելու է փետրվարի 21–ին, ավարտվելու մարտի 9–ին մինչև ժամը 24:00–ն:

 

Մանյա Պողոսյան