Վարդան Բոստանջյան. «Քաղաքացին պարզապես ուզում է հասկանալ, ինչո՞ւ է վաղն ավելի վատ ապրելու, քան այսօր»

«Փաստ» օրաթերթը գրում  է

 

Հունվարի 17–ին Ազգային Ժողովում պատգամավորների հետ հարց ու պատասխանի ժամանակ, անդրադառնալով գնաճին, վարչապետ Կարեն Կարապետյանը նշել էր, թե իր կարծիքով այն սարսափելի չէ: Այնուհետև, համեմատական անցկացնելով հարևան երկրների հետ, շեշտել էր, որ Հայաստանում պաշտոնական գնաճը 2,6% է, Վրաստանում՝ 6,7%, իսկ Ադրբեջանում՝ 7,9%: ԱԺ «Ծառուկյան դաշինք»–ի պատգամավոր, տնտեսագետ Վարդան Բոստանջյանից հետաքրքրվեցինք՝ ՀՀ–ի պարագայում որքանո՞վ է տեղին նման համեմատութունը:

«Անձամբ ես նման համեմատություն չէի անի: Հասկանալի է, որ միջինացված ձևով բոլոր հիմնական և առաջին անհրաժեշտության ապրանքները, ինչպես նաև ծառայությունները Վրաստանում 2,5–3 անգամ ավելի էժան են, քան Հայաստանում: Օրինակ են նաև զբոսաշրջության մասին վիճակագրությունները, որոնց համաձայն՝ հայերը հիմնականում նախընտրում են Վրաստան մեկնել: Այս համատեքստում շատ կասկածելի մոտեցումներով ու մեթոդաբանությամբ հաշվարկված գնաճային ու տնտեսական աճի ցուցանիշները գոնե ինձ համար չեն կարող համոզիչ լինել»,– «Փաստ»–ի հետ զրույցում ասաց Վարդան Բոստանջյանը:

Պատգամավորը նկատում է՝ բոլոր հարուստ երկրներում, ինչպիսին, օրինակ` ԱՄՆ–ն և Եվրամիության երկրներն են, քաղաքացիներից որևէ մեկին չենք կարող կանգնեցնել ու հարցնել, հետաքրքիր է, որքա՞ն է ձեզ մոտ տնտեսական աճը:

«Նրանք հետաքրքրված չեն այդ ցուցանիշներով: Պարզապես տեսնում են՝ ապրում են, թե ոչ, ավելի լավ են ապրում, թե ավելի լավ չեն ապրում: Հասարակ քաղաքացուն հրամցված թվերը ոչինչ չեն նշանակում: Ամեն սպառող ինքը գիտի, սպառման դաշտում լավ, թե վատ վիճակում է գտնվում: Այս համատեքստում ես նման համեմատական վերլուծություն չէի անի թե՛ հարևան և թե՛ մեզանից ավելի հեռու գտնվող երկրների միջև: Նախընտրելի է խոսել մեր երկրում գոյություն ունեցող կառավարման արդյունավետության մասին:

Մասնավորապես՝ որքանո՞վ է այն արդյունավետ, որքանո՞վ ենք ռացիոնալ օգտագործում թե՛ ֆինանսական, թե՛ բնական ռեսուրսները, բարեկեցության ինչպիսի՞ մակարդակ ունենք, այն իջնո՞ւմ, թե բարձրանում է»,– ընդգծեց պատգամավորը՝ հավելելով, որ ցանկացած պարագայում որոշում կայացնողը կամ ղեկավարը հակված է նկարագրել իրավիճակն այնպես, ինչպես իր համար է ցանկալի:

«Հիմա որոշում կայացնողներից ում էլ հարցնենք՝ կասի, որ մեզ մոտ այդքան վատ չէ: Սակայն դա դեռ ոչինչ չի նշանակում: Քաղաքացին պարզապես ուզում է հասկանալ, ինչու է վաղն ավելի վատ ապրելու, քան այսօր, ի՞նչն է պատճառը: Սրա մասին պետք է խոսենք: Առանց որևէ վերլուծությունների և համեմատությունների մեծ հաշվով համոզված չեմ, որ մի տեղ լավ են ապրում, մի տեղ վատ և դրանով մխիթարվում են»,– ասաց մեր զրուցակիցը:

Անդրադառնալով վարչապետի այն կանխատեսմանը, թե մեր տնտեսական աճի տեմպերը լինելու են վերոնշյալ երկրներից ամենաբարձրը, Վարդան Բոստանջյանը նշեց. «Տնտեսական իրավիճակը բնութագրող ցանկացած թիվ որոշում կայացնողների ու մասնագետների համար է: Քաղաքացին առաջնորդվում է այն արդյունքով, թե իր ունեցած եկամուտների պայմաններում սպառման մակարդակը լավն է, թե վատ: Հիմա ես կարող եմ ասել, որ մենք ունենք մոտ 25% աճ, և կառաջարկեմ ձեզ շատ ուրախանալ: Դուք կուրախանաք միայն ինձ լսելուց հետո, բայց երբ գնաք տուն, կտեսնեք, որ դուք ավելի վատ եք ապրում: Թիվը որոշիչ չէ»:

 

Աննա Բադալյան